Qazir zaman damyǵan, ǵalamtor men túrli tehnıka zýlaı qaryshtap jatyr. Árıne, ultymyzdyń bastan keshken «tar jol taıǵaq keshýlerimen» salystyrsaq, áldeqaıda tynysh ýaqyt. Halyqtyń kózi ashyq, burynǵydaı bilimsiz qazaq az. Myń túrli óner úırenip, san túrli til bilem deseńiz de óz erkińiz. Shartarapty sharlap, álemniń eń shetki núktesine ketemin deseńiz de, Aıǵa ushamyn deseńiz de múmkindik kóp. Mamannyń ornyn jasandy ıntellekt pen robottar basyp jatqan ǵajaıyp zaman.
Baıqasaq, múmkindigi kóbeıip, ómiri jeńildegen saıyn osy ǵajaıyp zamanda adamdar da, ustanymdar da, qundylyqtar da ózgerip jatyr. Qoldan kelse, qonyshynan basatyndar kóbeıdi. Aınalańnyń bári qý, bári aqyldy: ańǵal, ańqaý adamdar azaıdy. Ýáde, adaldyq, senim degen uǵymdardy aıaqasty qylý da op-ońaı. Qazir jurt shendini ǵana syılaıdy. Tamyr-tanysy kóppen ǵana aralasady. Qonaq shaqyrsa da bári eseppen. Jyltyraqqa qumar, shynaıylyqty, tabıǵılyqty kóre almaıdy. Bilimi men talanty asqandar emes, ataǵy tosqandar abyroıǵa aınaldy. Aqyn-jazýshy, ǵalymdar emes, ánshiler men blogerler halyqqa jaqyn boldy. Ne ishemin, ne jeımin demegen soń obal-ysyrap ta kóbeıdi.
Gazet-jýrnal degendi tipti qolǵa almaıdy. Tegin kep jatsa, monshaǵa jaǵar, nan jaıǵanda astyna tóser... turmysqa keregi jarar, biraq oqylmaıdy. Etimiz úırenip ketkeni sonshalyq, buǵan tańǵalsańyz, sizge bireý tańǵalýy múmkin. Tipti oqý degennen tym jyraqqa alystap ketken qoǵam úshin myna sýrettegideı kitapty qoqysqa tastaý da qalypty jaǵdaıǵa aınalǵany ma? Bulaı oılaý da sumdyq.
Buryn nandy kezekpen alatyn, qantty merekede ǵana jeıtin almaǵaıyp zamanda kitap oqıtyn jurt búgingiden kóp edi. Tym kóp bolmasa da qundylyqtar búgingideı qoqysqa tastalmaıtyn. Álde, apam aıtpaqshy, «aqyrzaman» keldi degen osy ma?
