Búgin «Aqjaıyq» qory halyqtan jınalǵan qarjynyń esebin jarııalady.
«2024 jylǵy 28 naýryz – 8 sáýir aralyǵynda qor esep shotyna bıznes ókilderinen 63 115 303,3, jeke tulǵalardan 226 500, memlekettik organdar men olarǵa qarasty uıym qyzmetkerleriniń bir kúndik jalaqysy esebinen 12 171 777, memlekettik emes uıymdardan 5 302 358,76 teńge qarajat tústi», delingen qor taratqan baspasóz paraǵynda.
Qazirgi tańda «Aqjaıyq» qorynyń esepshotynda 80 815 939,1 qarajat jınaldy. Tasqyn saldarynan zardap shekkenderge qarjylaı kómek jınaý isi jalǵasa beredi.
Batys Qazaqstan oblystyq Azamattyq alıans prezıdenti Aslan Tapıshev sý tasqynynan zardap shekken turǵyndarǵa kelip jatqan gýmanıtarlyq kómek týraly aıtyp berdi.
Qazir «BQO Azamattyq Alıans» bastamasymen gýmanıtarlyq kómek jınaý shtaby ashylǵan.
Ortalyq Oral qalasy aqparattyq tehnologııalar kolledjinde - Karımýllın kóshesi, 2/1A mekenjaıynda (Omega zaýyty aıaldamasy) ornalasqan.
Qazirgi tańda gýmanıtarlyq kómek tótenshe jaǵdaı jarııalanǵan Oral qalasy, Syrym, Qaztalov, Qaratóbe, Terekti, Bórli aýdandaryna jetkizilip jatyr.
Kómek kórsetý shtaby oblys boıynsha qurylǵan 27 evakobekettiń qajetteligin eseptep, ondaǵy turǵyndarǵa ne qajet ekenin jyldam anyqtaý maqsatynda arnaıy ınstagram paraqshasy men koll-ortalyq ashty.
Búginge deıin búkil elimizden qoldaý-kómek kelip jatyr. Bul iske jergilikti kásipkerler, iri kompanııalar, qala turǵyndary, partııa músheleri, oblystyq máslıhat depýtattary, etno-mádenı birlestikter, qoǵamdyq uıymdar, jastar resýrstyq ortalyqtar ókilderi atsalysyp jatyr.
Sonyń ishinde «Sun City», «Petro-Unit» sııaqty iri kompanııalar, «Salut Orto KZ», «InvestProdjekt» JShS-teri, «Oral sút zaýyty», «Sýleımenova» JK, «SBS Grup», «Otdel stroı» kompanııasy, «ART STROY SERVİS 07», «Salut Orto KZ» JShSlar, «Elıon» tis emhanasy, «JelaevNAN», «Faberlic» kompanııasy men jergilikti kásipkerler de shet qalyp jatqan joq.
«Biz BIRGEMIZ» qaıyrymdylyq qory qaıyq, matras, motosorǵy jáne azyq-túlik kómegin jiberdi.
«ASAR UME» qaıyrymdylyq qorynyń kúshimen Qaratóbe, Bórli, Kaztalov, Syrym aýdandaryna motorly qaıyq, rezeńke etik, motosorǵy alyndy.
Sondaı-aq aýdandardaǵy kásipkerler, oblys eriktileri, sportshylar, taksı jáne gazel júrgizýshileri kómektesýde.
Qaratóbe aýdany kásipkerleri, oblystyq «Amanat» partııasy, Qazaqstan halqy Assambleıasy ókilderi, «Qazaq analary – Dástúrge jol» QB fılıaly, «Tarıhı shejire» respýblıkalyq uıymy jáne t.b. qalys qalmady.
Jalpy, sý tasqyny bastalǵan sátten bastap zardap shekken halyqqa 256 tonna gýmanıtarlyq kómek kórsetilgen. Onyń 230 tonnasy - azyq-túlik, 22 tonnasy - basqa da qajetti taýarlar jáne 4 tonnasy - dári-dármek.
Tótenshe jaǵdaı departamenti men BQO qoǵamdyq damý basqarmasy halyqty resmı aqparatpen qamtý maqsatynda arnaıy aqparattyq shtab qurdy.
Sý tasqynynan zardap shekkenderge gýmanıtarlyq kómek kórsetý jáne túrli qorlarǵa túsken qarjyny bólý jónindegi komıssııa quryldy. Komıssııa quramynda Qoǵamdyq keńesterdiń ókilderi, oblystyq máslıhat depýtattary, saıası partııalardyń kóshbasshylary, úkimettik emes uıymdardyń, etnomádenı ortalyqtardyń, ýákiletti memlekettik organdardyń jáne t.b. ókilderi bar.
Qazirgi tańda sý tasqynynan zardap shekkenderge 2 500-den astam erikti belsendi kómek kórsetip jatyr.
