Sý tasqyny kezinde Sh.Bersıev atyndaǵy aýyldyq okrýginiń Qaratal aýyly men Oıyl aýyldyq okrýgine qarasty Ekpetal aýyly turǵyndarynyń úılerine sý kirgen. Saldarynan Ekpetal aýylyndaǵy barlyq úıler turýǵa jaramsyz bolyp qaldy. Oblys ortalyǵynan 5 shaqyrym jerde ornalasqan aýyl turǵyndary endi Oıyldyń ózine qonystanbaq.
«Sý basqan aýyldyń turǵyndary evakýasııalanyp, oblys ortalyǵyna jetkizildi. Endi Oıyldyń ózinde Ekpetal aýylynyń turǵyndaryna úı salýdy josparlap otyrmyz. Turǵyndar óz kelisimderin berdi. 482 - 690 ýchaskeler arasyndaǵy aýmaqta turǵyn úı qurylysy úshin bos oryndar bar. Turǵyn úı qurylysynyń ınfraqurylymy, ıaǵnı gaz, sý tolyq qamtylǵan. Osy aýmaqtarda Ekpetal kentiniń turǵyndary úshin turǵyn úı salýdy josparlap otyrmyz», dedi Oıyl aýdanynyń ákimi Asqar Qazybaev.
Sonymen qatar Oıyl aýdanynda 1500 adamdyq mektep pen 90 adamdyq balabaqsha salýǵa jer telimi de qarastyrylǵany qosa habarlandy.
Eske sala keteıik, 29 naýryzda Oıyl aýdanynda tótenshe jaǵdaı rejımi engizilgen edi.
Qyrmyzy JUMAǴALIQYZY,
EUÝ stýdenti
