О́ńirdi elektr qýatymen qamtamasyz etip otyrǵan «Batys Qazaqstan aımaqtyq elektr jelilik kompanııasy» JShS búginde ártúrli kerneýdegi 20 531 shaqyrym elektr jelisine qyzmet kórsetedi eken. Sý tasqynyna baılanysty alǵashqy apat naýryzdyń 26-si kúni boldy. Sol kúni toqtaýsyz jaýǵan jaýyn-shashynǵa baılanysty Oral qalalyq elektr toraby óship, Zachagansk, 2 Jumysshy, Eski áýejaı shaǵynaýdandarynda 2879 abonent jaryqsyz qaldy. Abyroı bolǵanda 2 saǵat ishinde aqaý joıyldy.
«Tasqyn sýǵa baılanysty tabıǵı sıpattaǵy tótenshe jaǵdaı jarııalanǵan sátten bastap oblys aýmaǵynda elektr jelilerinde 6 márte aqaý shyqty. Máselen, Qaratóbe aýdanynda – 1 oqıǵa, Syrym aýdanynda – 3, Shyńǵyrlaý men Bórli aýdandary boıynsha - 1 oqıǵadan boldy. Barlyǵy 1803 abonent jaryqsyz qaldy. Biz jedel qımyldap, 1 saǵat pen 2 kún arasynda apatty joıyp, jaryqty qostyq», deıdi oblystyq energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáı.
Qazir óńirlik Tótenshe jaǵdaılar departamentiniń buıryǵymen, Jaıyqtan tasyǵan sý basý qaýpine baılanysty Derkól kentine qarasty Mashtakov, Iаgodka, Úmitker saıajaılary, Podstepnyı orta mektebiniń ǵımaraty, Ivýshka shıpajaıy, Zdorove baý-baqsha seriktestigi, Kardıologııalyq ortalyq mańyndaǵy saıajaılar elektr jelisinen ajyratylǵan. Sondaı-aq Shyńǵyrlaý aýdanyndaǵy Ashysaı aýyly, Báıterek aýdanyndaǵy Mahambet aýylynda da ishinara jaryq berýdi toqtatýǵa týra kelgen.
«Sý qaýipsiz deńgeıge túsken soń bul eldi mekenderdi elektrmen jabdyqtaýdy qalpyna keltiremiz», deıdi Mıras Rústemuly.
Qazir elektrmen jabdyqtaýshy kompanııa tehnologııalyq apattardy jedel joıý úshin 10 brıgada, 35 qyzmetker jáne 10 tehnıkany ázirlep qoıǵan.
Tilsiz jaý tabıǵı gaz jelilerine de az zaqym keltirmedi. Sý tasqyny bastalǵaly beri «QazTransGaz Aımaq» AQ Batys Qazaqstan óndiristik fılıaly jumysshylary sý basqan 5 aýdannyń birneshe eldi mekeninde gaz berýdi ýaqytsha toqtatýǵa týra keldi.
Mysaly, 30 naýryz kúni halyqty evakýasııalaýǵa baılanysty Oral qalasyna qarasty Mashtakov aýylynan – 94 tutynýshy, Qaratóbe aýdanynyń Qorjyn aýylynan – 90 úı, Terekti aýdanynyń Ańqaty aýylynan – 37 abonent, Bórli aýdanynyń Aqsý, Keńtúbek, Baqtyaral, Araltal, Pýgachev aýyldarynan – 237 úı, Syrym aýdanynyń Buldyrty jáne Qosaral aýyldarynan – 31 abonent kógildir otynsyz qaldy. Barlyǵy 489 tutynýshynyń turǵyn úıine kire beristegi krandar qaýipsizdik úshin óshirildi.
31 naýryzda Terekti aýdany Podstepnoe aýylyna erigen sýdy aǵyzý kezinde ekskavator ortasha qysymdy Dý – 160 mm jerasty polıetılen gaz qubyrdy zaqymdap alǵan bolatyn. Sonyń saldarynan Podstepnoe aýylyndaǵy jeke sektordyń 1877 tutynýshysy men 47 kommýnaldyq kásiporyn gazsyz qaldy. Sol kúni apat ornyna 15 adam, 2 ekskavator, 2 apattyq jóndeý gaz kóligi, 2 apattyq gaz kóligi jınalyp, zardapty joıýǵa kiristi. 2-sáýirde buzylǵan gaz qubyry qalpyna keltirildi. Biraq erigen sýdy aǵyzý úshin jer qazyp júrgen ekskavator Podstepnyı aýylynyń shetinde Dý-160mm ortasha qysymdy gaz qubyryn taǵy da birneshe ret zaqymdady. Jeke sektordaǵy 1877 tutynýshy men 47 kommýnaldyq kásiporyn ýaqytsha gazsyz qalǵanymen, sol kúni gaz berý qalpyna keltirildi.
Al sáýirdiń 3-i kúni keshki saǵat 18:00-de sý basý qaýpi bar eldi mekende jeke sektordyń gaz shúmegi jabyldy. 556 tutynýshy ýaqytsha gaz jelisinen ajyratyldy.
Sońǵy kúnderi oblys aýmaǵyna Reseıden tasqyn sý úzdiksiz kelip, ózenderde sý deńgeıi kóterilip jatyr. Osyǵan oraı 4-sáýirde sý basý qaýpi bar eldi mekenderdegi jeke sektordyń 961 tutynýshysy tabıǵı gazdan ajyratyldy. 8-sáýirde saıajaılar men jeke turǵyn úı sektorynda turatyn 922 tutynýshy da gazsyz qaldy. Munyń bári qaýipsizdik úshin jasalǵan amalsyz shara.
«Tasqyn qaýpi seıilgen eldimekenderde kommýnaldyq qyzmet jelilerin birden qalpyna keltiremiz», deıdi Mıras Múlkáı.
Batys Qazaqstan oblysy
