Foto: senate.parlam.kz
«Mınıstrlikter men ákimdikterdiń sý qoımalaryn salý, erigen qar sýyn jınaý jáne ózen arnalaryn tazartý jónindegi on jyl burynǵy orasan zor josparlary qaǵaz júzinde qaldy», degen Serik Shaıdarov elimizde jyl saıyn sý tasqyny oqıǵalary qaıtalanatynyn aıtty. Onyń aıtýynsha, bılik mundaı apattardyń aldyn ala almaı, keıin tek saldarymen kúresedi.
«Jyl saıyn kózben kórip, tekserýdiń qorytyndysy boıynsha 537 gıdrotehnıkalyq qurylysty jóndeý qajet ekeni anyqtaldy, onyń ishinde 427 gıdrotehnıkalyq qurylys kommýnaldyq menshikte tur. 2024 jyly kommýnaldyq menshiktegi bógetterge kóp faktorly tekserý júrgizý men qaýipsizdik deklarasııasyn resimdeýge 20 óńirdiń tek 5-eýinde ǵana bıýdjetten qarjy kózdelgen. 2025-2026 jyldarǵa eshqandaı oblysta qarjy qarastyrylmaǵan. Jaǵdaı nege bulaı? Eń aldymen, qoldanystaǵy zańnamanyń jetilmegendigi sebep bolyp otyr», dedi senator.
Senatordyń aıtýynsha, mundaı qurylystardy paıdalaný, kútip ustaý jáne jóndeý úshin qarjy kerek. 2010-2012 jyldary ıesiz bógetterdi anyqtaý qorytyndysyna sáıkes olardyń barlyǵy sot sheshimi boıynsha aýdandyq kommýnaldyq menshikke ótti. Qoldanystaǵy zańnama aıasynda olardy basqarý úshin aýdandar oblystyq kommýnaldyq menshikke berýi kerek edi, al olar óz kezeginde qarjy jumsamaý úshin qaramaǵyna qabyldamaǵan.
«Gıdrotehnıkalyq qurylystardyń shamamen 75%-y aýdandyq kommýnaldyq menshikte. Máseleni qysqa merzimde zerdelep, zańnamaǵa ózgeris engizip, aýdandar men qalalarǵa ókilettik berý kerek. Oblystaǵy jergilikti atqarýshy organdarynda da gıdrotehnıkalyq qurylystardy kútip ustaý jáne paıdalaný jónindegi memlekettik kásiporyndar qurý quqyǵy fýnksııasy bar, gıdrotehnıkalyq qurylystardy oblystyq jáne aýdandyq kommýnaldyq menshikke jatqyzý sharttaryn aıqyndaý qajet dep sanaımyz», dedi senator.
Serik Shaıdarov árbir eldi mekenniń bas josparynda aýmaqtardy tabıǵı qubylystardyń qaýipti áserinen qorǵaý jónindegi sharalardy tirkeýdi jáne daıyndaýdy, olardy iske asyrýdy, sondaı-aq eldi mekenderdi ınjenerlik qorǵaý jónindegi ınvestısııalyq jobalardyń qaı jerde iske asyrylǵanyn tekserýdi usyndy.
