Shahar basshysynyń málimdeýinshe, qoǵamdyq kólikter I toptaǵy múgedekterdi, «Batyr ana», «Altyn alqa», «Kúmis alqa» tós belgisi bar analardy, Tyl ardagerlerin, zaǵıp jandar men olardy alyp júretin kisilerdi bul kúnde tegin tasymaldaıdy.
Sonymen birge qazirgi tańda jeti men on segiz jastaǵy mektep oqýshylary jolaqy qunynyń jartysyn tólese, stýdentterdiń bılet baǵasy 50 teńgeni quraıdy. Endigi rette jergilikti ákimdik halyqtyń áleýmettik jaǵdaıyn eskere otyryp qoǵamdyq kólikte tegin júretin azamattardyń sanatyn taǵy da arttyrmaqshy. Sonymen tegin júrý quqy bar joǵarydaǵy kisilerden bólek bıyl 1 mamyrdan bastap tómendegi azamattar avtobýstarda aqysyz qatynaıtyn bolady.
Atap aıtqanda, Uly Otan soǵysynyń ardagerleri, jeńildikter boıynsha Uly Otan soǵysynyń ardagerlerine teńestirilgen ardagerler, basqa memleketterdiń aýmaǵynda urys qımyldaryna qatysqandar, «Qazaqstannyń Eńbek Erleri», UOS jyldarynda tyldaǵy qajyrly eńbegi men minsiz áskerı qyzmeti úshin burynǵy KSRO ordenderimen jáne medaldarymen nagradtalǵandar, 1941 jylǵy 22 maýsym - 1945 jylǵy 9 mamyr aralyǵynda keminde alty aı jumys istegen (qyzmet ótkergen) jáne Uly Otan soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalmaǵan adamdar, saıası qýǵyn-súrgin qurbandary, II top múgedekteri, múgedektigi bar balalar, 70 jastan asqan zeınetkerler, mektep oqýshylary.
О́z kezeginde qala ákimi jolaýshylar tasymalyn uıymdastyrý men onyń sapasy ákimdiktiń tikeleı baqylaýynda turǵanyn, osynaý qyzmetti jaqsartýǵa atqarýshy bılik tarapynan barlyq múmkindikter jasalyp jatqanyn jetkizdi.
