Tabıǵı apatqa qarsy kúreste el azamattary birigip jatyr. Osy tusta Ulttyq ulan da nazardan tys qalmady, atap aıtqanda, táýlik boıy rejımde júzdegen áskerı qyzmetshiler bar, jalpy 3 myńnan astam ofıser men serjanttar, kýrsanttar men quqyqtyq tártip áskerleriniń sarbazdary tartyldy.
Ulandyqtar azamattardy tabıǵı apat aımaqtary týraly qulaqtandyrýǵa jáne evakýasııalaýǵa belsendi qatysyp jatyr, evakýasııalyq pýnktterge gýmanıtarlyq kómek jiberildi, tonaýǵa jol bermeý maqsatynda polısııa qyzmetkerlerimen birlesip, sý tasqynymen qamtylǵan kóshelerdi patrýldeı otyryp, quqyqtyq tártipti qamtamasyz etip otyr, odan bólek, jaǵalaýdy nyǵaıtý jumystaryn júrgizip, sýdy burýdy jáne kanaldardy tazartýdy júzege asyryp jatyr.
Sý tasqynyna qarsy is-sharalardy ótkizý úshin QR Ulttyq ulany akademııasynyń 400 kýrsanty jáne «Ortalyq» óńirlik qolbasshylyǵynyń Petropavl qalasyndaǵy 6637 áskerı bóliminiń 200-ge jýyq sarbazy tartyldy. Olar sý tasqynyna qarsy is-sharalardy júrgizýge jáne turǵyn úı sektorynyń erigen sýlarmen sý basýynyń aldyn alýǵa kómek kórsetý úshin - Kojevnyı, Olshanka, Teplıchnyı jáne Beskól kentterinde ınertti materıal salynǵan qaptardy daıyndaý jáne tóseý úshin tartyldy. Kýrsanttar men sarbazdar jaǵalaýdy nyǵaıtý jumystaryna belsendi qatysady jáne ınertti materıaldarmen qaptar jınaıdy.
Budan basqa, 5546 (Atyraý q.) áskerı bóliminiń qyzmetshileri 10 avtotehnıka birliginde 120 adamnan astam sý tasqynyna qarsy is-sharalardy ótkizýge belsendi qatysyp júr, sondaı-aq polısııa qyzmetkerlerimen birlesip Qulsary qalasy kóshelerinde tonaýǵa jol bermeý boıynsha qyzmet atqarady.
Oral men Aqtóbede sý tasqynyna qarsy is-sharalar men qoǵamdyq tártipti qorǵaý úshin jeke quram tartylyp jatyr, dálirek aıtqanda 5517 jáne 6655 áskerı bólimderi 800-den astam áskerı qyzmetshini jiberdi.
Jalpy 2 myńnan astam quqyqtyq tártip jaýyngerleri jaǵalaýdy nyǵaıtý jumystaryna belsendi qatysyp jatyr, sý burýdy jáne kanaldardy tazartýdy júzege asyrady, azamattardy tabıǵı apat aımaqtarynan evakýasııalaıdy, tonaýǵa jol bermeý maqsatynda sý tasqynymen qamtylǵan eldi mekenderdi polısııa qyzmetkerlerimen patrýldeı otyryp, quqyqtyq tártipti qamtamasyz etip júr.
Sondaı-aq búgin keshke Oral jáne Atyraý qalalaryna temir jol kóligimen taǵy myńǵa jýyq ulandyqtar keledi dep josparlanyp otyr. Dálirek aıtsaq, 6506 (Shymkent q.), 5547 (Qyzylorda q.) jáne 5451 (Qaraǵandy q.) áskerı bólimderiniń áskerı qyzmetshileri kelgennen keıin osy óńirlerde sý tasqynyna qarsy is-sharalarǵa kómek kórsetýge kirisedi.
Sonymen qatar,Petropavl qalasyna kelgennen keıin 200 áskerı qyzmetshiden turatyn Ulttyq ulannyń jedel brıgadasynyń jeke quramy sý basqan eldi mekenderdiń kóshelerinde tonaýǵa jol bermeý úshin Soltústik Qazaqstan oblysy boıynsha 3 aýysymda qoǵamdyq tártipti qorǵaýǵa kiristi.
Sý tasqyny bastalǵannan beri Ulttyq ulannyń 120 áýe jáne avtomobıl tehnıkasy tartylǵanyn atap ótken jón. 1248 adam evakýasııalandy, ınertti materıaldary bar 294765 qapshyq daıyndaldy jáne tóseldi, jaǵalaýdy nyǵaıtý jumystary úshin 900 tonnadan astam topyraq shyǵaryldy jáne 91,5 tonnadan astam gýmanıtarlyq kómek jetkizildi.
