Reseıden keletin sý 17 sáýirde Iаnvarsevo aýylynyń sý qoımasy arqyly ótedi deıdi mamandar. Sol sátten bastap Jaıyq ózeninde sý tasqynynyń sharyqtaý shegi bastalady dep kútiledi. 20-21 sáýirde Oralǵa sý keledi dep boljanyp otyr. Qazir qutqarý jumystaryna 6 533 adam jumyldyrylǵan. 915 tehnıka, 21 sý aıdaý quraly, 32 júzý quraly, 5 áýe kemesi osy qyzmette júr.
Oral qalasynda jaǵalaýdy nyǵaıtý jumysy úzdiksiz júrip jatyr. Birqatar tusta bul jumys aıaqtalyp qaldy. Qala boıynsha jalpy uzyndyǵy 14,1 shaqyrym jerde sýǵa qarsy tosqaýyl daıyndalǵan. Bógetterdi bıiktetý, qum salynǵan qapshyqtarmen nyǵaıtý úshin kún saıyn 200-den asa tehnıka jáne myńǵa jýyq adam jumyldy. Jergilikti atqarýshy organ, tótenshe jaǵdaı qyzmeti, kommýnaldyq mekemeler men áskerı bólimderdiń qyzmetkerleri, ózge óńirlerden kelgen tótenshelikter, qaladaǵy volonterler men belsendi turǵyndar sý tasqynyna daıyndyq jumysyna kúni-túni bir kisideı atsalysyp jatyr.
Árıne, tasqynnan zardap shekken halyq bolashaǵyna alańdap otyr. Osyǵan baılanysty oblystyq prokýratýra júıeli túrde aqparattyq-túsindirý jumysyn júrgizip, halyqqa kómek kórsetip jatyr. Sý tasqyny saldarynan múlki búlingen adamdar memleket kómegin ala alady. Qazirdiń ózinde 600-den asa azamatqa 126 mln teńgeden asa birjolǵy materıaldyq kómek tólengen.
Qazir óńirde úılerin sý basqan jáne qaýip tóngen turǵyndar úshin 20 evakýasııalyq beket jumys istep tur. Mektepte, sport zaldarynda jáne basqa da turýǵa arnalmaǵan úı-jaıda adamdar úshin qolaıly jaǵdaı jasaý qıyn. Sondyqtan bul turǵyndar birtindep ártúrli jataqhanalarǵa aýystyrylyp jatyr.
Sáýirdiń 13-inde jumys saparymen Batys Qazaqstan oblysyna kelgen Densaýlyq saqtaý mınıstri Aqmaral Álnazarova da Oral qalasynda birneshe nysanǵa bardy. Sonyń ishinde «Batys sý arnasy» JShS-nyń sý tazalaıtyn zerthanasy, jergilikti sanıtarlyq-epıdemıologııalyq baqylaý komıtetiniń bakterıologııalyq zerthanasy bar. Qos zerthana mamandarynyń aıtýynsha, tasqyn sý basý kezeńinde óńirde aýyzsýdyń sapasy talapqa saı. Mınıstr quzyrly mekeme basshylaryna aýyzsý sapasyn erekshe baqylaýǵa alýdy tapsyrdy.
О́ńirde «Qazsýshar» mekemesine qarasty sý qoımalaryna sý jınaý jumysy da qarqyndy júrip jatyr. Keıingi málimet boıynsha, qoımalarda 391,92 mln tekshe metr sý jınalǵan, sý qoımalarynyń ortasha tolýy – 77,3%. Oblystyq fılıal Reseıdiń Orynbor, Saratov oblystarynyń sý sharýashylyǵy qyzmetterimen kúndelikti aqparat almasyp otyr. Saratov oblysyndaǵy Prıýzen sý qoımasynan Qaraózen men Saryózenge búginge deıin 434,56 mln tekshe metrden asa tasqyn sý quıylǵan. Bul kóltabandarǵa, tabıǵı shabyndyqtarǵa, sondaı-aq sý qoımalary men kólderdi toltyrýǵa baǵyttalyp jatyr.
Qazir Shaǵan sý qoımasynda sý deńgeıi tolyq, 29,70 metr bolyp tur. Shaǵan jáne Derkól ózenderi boıyndaǵy gıdrobeketterde sý deńgeıi tómendegeni baıqalady. Orynbor oblysynda ornalasqan Irekli sý qoımasynan Jaıyq ózenine sý 13 sáýir kúni sekýndyna 447 tekshe metr sý jiberilip jatyr. Bul osydan birneshe kún burynǵy mólsherden ájeptáýir tómen. Jaıyq ózeni deńgeıi ázirge táýligine 10-12 sm ósip keledi. Jalpy sý tasqyny bastalǵaly ózen deńgeıi Oral qalasy tusynda 6 metrge kóterildi.
Tótenshe jaǵdaı departamentinen kelgen sońǵy málimetke qaraǵanda, Batys Qazaqstan oblysynda áli de 9 eldi meken ortalyqpen qatynasa almaı otyr. Bul – Qaratóbe aýdanyndaǵy Qosbaz, Aqqozy, Qorjyn, Aqtaısaı, Besoba, Alakól, Sáýle, Qaraqamys aýyldary, Shyńǵyrlaý aýdanyndaǵy Aqtaý aýyly. О́ńirde 1 905 saıajaıdy sý basty. Osy kezge deıin 13 193 adam evakýasııalandy, onyń ishinde 5 522 bala, 19 múmkindigi shekteýli adam bar. Evakýasııalyq beketterde 1 733 adam ornalasqan, onyń – 780-i bala. 11 460 adam týystarynda turyp jatyr. Sý basqan jerlerden 4 886 mal qaýipsiz jerge aıdalǵan.
Batys Qazaqstan oblysy
