Kitap kórmesine Qazaqstan, Reseı, Túrkııa, Iran, О́zbekstan, Ispanııa, Qytaı elderinen baspa, kitap satý, tanymdyq-ǵylymı bilim berý jáne polıgrafııalyq ónimderin usynatyn 70-ke jýyq kompanııa qatysady.
Bıylǵy jobanyń negizgi maqsaty – balalar men jasóspirimderdi kitap oqýǵa baýlý, otbasymen birge kitap oqýdy nasıhattaý, jastardyń oqyrmandyq talǵamyn qalyptastyrý, oqyrmandarǵa jetekshi baspalardyń kitap ónimderiniń eń jaqsy zamanaýı assortımentin usyný, álemdik kitap shyǵarý jáne baspa ındýstrııasynyń tájirıbesimen almasý, álemdik baspalarmen baılanys ornatý jáne baspa isindegi jetistikterdi kórsetý bolyp otyr.
«Astana Eurasian Book Fair – 2024» halyqaralyq kitap kórme-jármeńkesi eresekterge de, balalarǵa da birdeı qyzyqty bolatyn bes kúndik mádenı-iskerlik baǵdarlamadan turady. Kórme qonaqtary men qatysýshylaryn jetekshi otandyq jáne sheteldik baspalardan balalar ádebıeti, kórkem ádebıet, ǵylymı-tanymdyq ádebıetterdiń tusaýkeseri, belgili aqyn-jazýshylarmen qoltańba-sessııalar, kitap shyǵarýdyń ózekti máseleleri talqylanatyn dóńgelek ústelder kútedi. Bes kúndik kórmede kún saıyn oıyn alańynda kitap oqý, sheberlik synyptary, taǵy basqa da qyzyqty is-sharalar ótkiziledi.
Aıta keteıik, kitap kórme-jármeńkesin dástúrli túrde «Folıant» baspasy uıymdastyryp keledi.
Sondaı-aq bıyl kórmege kirý aqyly bolmaq. Kirý baǵasy – 500 teńge (zeınetkerlerge, balalarǵa, oqýshylarǵa, stýdentterge, kópbalaly analarǵa, múmkindigi shekteýli jandarǵa kirý tegin). Jınalǵan qarjy sý tasqynynan zardap shekken aımaqtarǵa jiberiledi.
