Sýretti túsirgen – Jeńis Ysqabaı
«Qorǵas» iri logıstıkalyq habyna «The Hansa Consortium» kompanııasy 250 mlrd teńge qarjy quımaqshy. Birlesken jobanyń júzege asýy 700 jumys ornyn qurady dep kútiledi. Joba qýaty 50 myń tonna júk tasymaldaýǵa, jolaýshylar termınalynan saǵatyna 500 adamǵa deıin ótkizýge qabiletti.
«Búginde «Qorǵas – Shyǵys qaqpasy» AEA-nyń biryńǵaı tizilimine 56 qatysýshy tirkelgen, olarda jalpy quny 800 mlrd teńgeden asatyn jobalar bar. «KTZE-Khorgos Gateway» qurǵaq porty – arnaıy ekonomıkalyq aımaqtyń negizgi nysandarynyń biri. Bul – Ortalyq Azııadaǵy aýmaǵy 103 gektarǵa jýyq jerdi alyp jatqan eń iri qurǵaq port jáne teńiz logıstıkalyq habtarynyń aıryqsha balamasy. AEA aýmaǵynda ınvestorlar úshin, sol qatarda sheteldik ınvestorlar úshin de jeńildikter men artyqshylyqtar, arnaıy tarıfter qoldanylady. Qatysýshy sany jyl saıyn artyp kele jatqandyqtan, aýmaqta halyqaralyq júk-jolaýshylar áýejaıynyń ashylýy tranzıttik áleýetti odan ári damytýǵa oń yqpal etedi», dedi oblys ákimi Beıbit Isabaev ınvestorlarmen kezdesýde.
«Skymax tehnologies» kompanııalar toby» JShS Bas dırektory Erik Shortanbaevtyń aıtýynsha, úsh kezeńnen turatyn joba aıasynda halyqaralyq júk-jolaýshylar áýejaıyn salýdan bólek, qajetti ınfraqurylymmen qamtý, óndiristik qýatty ulǵaıtý, qonaqúı, saýda-oıyn-saýyq ortalyǵyn iske qosý kózdelgen. Osylaısha, joba 2032 jyly tolyǵymen aıaqtalady. Biraq áýejaı 2027 jyly paıdalanýǵa beriledi dep josparlanǵan.
E.Shortanbaevtyń aıtýynsha, jobany iske asyrýdyń birinshi kezeńinde áýejaıdyń negizgi ınfraqurylymy salynady, al ekinshi jáne úshinshi kezeńderde qosymsha ınfraqurylymdardy aıaqtaý, jolaýshylar termınalynyń ótkizý qabiletin, júk jáne otyn qoımalarynyń qýatyn keńeıtý qarastyrylǵan. Sondaı-aq ınvestorlar saýda, týrıstik qyzmet, tamaqtaný jáne ornalastyrý qyzmetteriniń keshenin keńeıtip, damytýǵa nıetti. Atap ótsek, áýe laınerlerine zamanaýı Jet a-1 otyny paıdalanylmaq.
Beıbit Isabaevtyń sózinshe, jobany iske asyrý úshin memleket tarapynan qajetti qoldaý kórsetiledi.
«Strategııalyq mańyzdy jobanyń sátti aıaqtalýy úshin syrtqy ınfraqurylymdy júrgizý máselesinde zań aıasynda qajetti qoldaý kórsetýge daıynbyz. Sizderdiń qandaı mindetteme alatyndaryńyzdy, bizdiń tarapymyzdan naqty qandaı qoldaý kerektigin, sonyń bárin ár kezeńge egjeı-tegjeı naqty belgileý kerek», dedi óńir basshysy. Kezdesý sońynda taraptar yntymaqtastyq týraly memorandýmǵa qol qoıdy.
Jetisý oblysy
