Erdiń erligi, eldiń eldigi synalatyn shaqta el ishindegi azamattar da aıanyp qalǵan joq. Qazir sýdan zardap shekkenderge erikti azamattardan 1 713 tonna gýmanıtarlyq kómek jınaldy. Onyń 1 320,4 tonnasy óńirlerge jetkizildi. Buǵan qosa sheteldegi aǵaıyndar da qor ashyp, qolushyn berýge bekinip otyr. Tipti gýmanıtarlyq kómektiń alǵashqy legi jolǵa shyǵyp ta qoıdy. Máselen, Reseı qazaqtary Soltústik Qazaqstan oblysyndaǵy tótenshe jaǵdaıǵa baılanysty gýmanıtarlyq kómek jınap, alǵashqy legin bes «GAZel» júk kóligimen (aýyzsý tıelgen) Ombydaǵy «Iman» meshitinen Petropavlǵa jóneltti. Al Astrahan qazaqtary Atyraý jáne Qulsary qalalaryna segiz «GAZel» júk kóligimen gýmanıtarlyq kómek jetkizdi.
«Sý tasqynynyń aldyn alý sharalary úshin qajetti qap, kúrek, qaıyq sııaqty kerek-jaraqtar men azyq-túlik jetkizildi», dep habarlady «Otandastar qorynyń» baspasóz qyzmeti.
Al О́zbekstandaǵy «Dástúrge jol» qazaq analary uıymynyń tóraǵasy Klara Sadyrbaeva hanymnyń aıtysyna qaraǵanda, ondaǵy aǵaıyndar da gýmanıtarlyq kómek jınap jatqan kórinedi.
– Biz atamekenimizde bolyp jatqan osynaý qıyn jaǵdaıda demeý bolyp, qandastarymyzǵa qoldaý bildiremiz. Memleket basshysy alapat kúshke toıtarys berýi úshin bar kúshti salyp, qareket jasap jatqanynan habardarmyz. Sondaı-aq óte áserli sáti, memlekettik qurylymdar ǵana emes, qarapaıym azamattar men turǵyndar jumylyp, sý tasqynyna tosqaýyl bolyp jatyr. Bul – birlik pen yntymaqtyń ajyramas bóliginiń aıqyn kórinisi. Eldiń iri kásiporyndarymen qatar, Qazaqstan azamattary jylý jınap, mıllıardtaǵan qarjy bólinip jatyr. Kórshi elder men baýyrlas memleketter gýmanıtarlyq hám qarjylyq qoldaý bildirýge ázir. Biz osynaý qıyn-qystaýda moraldyq hám rýhanı demeý kórsetip, osynaý kezeńnen aman shyǵýyna shyn júrekten tilekshimiz, – deıdi K.Sadyrbaeva.
AQSh-tyń Vashıngton, Merılend, Vırdjınııa shtattarynda turatyn nemese ýaqytsha jumys isteıtin otandastarymyz Qazaqstan-Amerıka qaýymdastyǵyna toptasqan. Olar amerıkalyq bankten esepshot ashyp, arnaıy qor qurypty. Sonymen qatar qorǵa jergilikti turǵyndar da atsalysyp jatqan kórinedi.
– Qaıyrymdylyqqa aqshany qalaı aýdarýǵa bolady degen suraqtar kóp bolǵandyqtan, biz Qazaqstan-Amerıka qaýymdastyǵynyń atynan qor qurdyq. Bir jaǵynan, bul qarajattyń qaıda ketip jatqanyn naqty bilýge jáne alaıaqtarǵa aldanyp qalmaý úshin jasaldy, – deıdi qaýymdastyq tóraǵasy Rasýl Eshpaev.
Al AQSh-tyń Chıkago qalasyndaǵy «Qazaq center» uıymy da elge kómek retinde «Gofundme» platformasy arqyly qarjylaı kómek jınaıtynyn habarlady.
– Jınalǵan qarajat elimizdegi tasqyn sýdan zardap shekken aımaqtarynda jumys istep jatqan uıymdarǵa tikeleı aýdarylady. Olar qıyn jaǵdaıda táýlik boıy jumys istep jatyr, – deıdi belsendi otandastarymyz.
Sonymen qatar Ońtústik Koreıadaǵy Qazaq qaýymdastyǵy da Pýsan qalasyndaǵy Qazaqstan bas konsýldyǵymen birlesip, Koreıadan elimizde sý tasqynynan japa shekken óńirlerge gýmanıtarlyq kómek uıymdastyryp jatyr. Onyń ishinde gıgıenalyq zattar, tósek jabdyqtary, rázińke etik, balalar kıim-keshekteri men balalar aıaqkıimi bar. Al Dımash Qudaıbergenniń Ulybrıtanııadaǵy jankúıerleri Qazaqstan halqyna kómektesýge ázir. Buǵan qosa Germanııa astanasy Berlındegi otandastarymyz gýmanıtarlyq kómek jınap jatyr. О́tkende Qyzjibek Dáýletqyzy esimdi bloger «Tık-Tok» jelisi arqyly Qytaıdaǵy qandastardan qarjylaı kómek jınap, Aqtóbedegi aǵaıynǵa jetkizgen edi. Onyń aıtýynsha, kómek kórsetkender tek Qytaıdaǵy qazaqtar eken.
Sondaı-aq Mońǵolııadaǵy qandastardyń atajurttaǵy tabıǵı apattan zardap shekken aǵaıyndarǵa kómek kórsetýge óte belsendi jumylyp jatqanyn aıtady sonda saparmen júrgen áriptesimiz Búrkit Nurasyl.
– Mońǵolııada birneshe qoǵamdyq uıymdar qor ashyp, qarjy jınap jatyr. Baı-О́lke, Qobda aımaǵyndaǵy qazaqtarmen qatar Mońǵolııanyń barlyq jerindegi aǵaıyn kómegin aıap jatqan joq. Bir qyzyǵy, Baı-О́lkedegi polıseı qyzmetkerleri 1 mln tógróg kóleminde qarjy aýdarsa, bıýjettik mekeme qyzmetkeri de aılyqtarynyń bir bóligin berip jatyr eken. Barlyq jınalǵan qarajat Mońǵolııadaǵy Qazaqstan elshiligi arqyly qarjylaı jiberilmek, – deıdi ol.
Baı-О́lke aımaǵynyń О́lgeı qalasyndaǵy №1 mektebiniń Janar Iаsymhanqyzy jetekshilik etetin 6-synybynyń oqýshylary elimizdegi sý tasqynyna ushyraǵan aımaqtaryndaǵy balalarǵa arnap 200 myń tógróg jınapty. «Kúndelikti kámpıt-tátti alatyn aqshamyzdyń artylǵanyn jınap, atajurttaǵy dostarymyzǵa jiberýdi uıǵardyq. Biz sendermen birgemiz!» deıdi oqýshylar.
Qoryta aıtqanda, «Qazaqtyń qazaqtan ózge janashyry joq» degen sózge qalaı ılanbaımyz? Ár jerde júrgen at tóbelindeı aǵaıyn atamekendegi apatty jaǵdaıǵa beıjaı qarap qalmaı, qara shańyraqtyń shaıqalmaýyna qashanda tilekshi ekenin bildirdi. Ol kómek kópshilikke ıa jeter, ıa jetpes. Másele onda emes. Alystaǵy otandastarymyzdyń kóńili jetti. Alapat órtke qanatymen sý sepken qarlyǵashtaı qamqorlyq qylǵan baldyrǵandardyń da temirqazyǵy qaıda ekenin bildirse kerek.
