Foto: avtotema.mediasalt.ru
Zańǵa qandaı ózgerister engizildi?
Densaýlyqqa zııan keltirmeıtin jazataıym oqıǵa úshin júrgizýshi kýáliginen aıyrmaý usynyldy.
Moped júrgizýshileri jol qozǵalysynyń tolyqqandy qatysýshylarymen teńestiriledi.
Májilis «Jol júrisi týraly» Zańǵa jáne Ákimshilik quqyqbuzýshylyq týraly kodekske jekelegen kólik quraldary túrleriniń júrýin uıymdastyrý jáne jol qaýipsizdigin sıfrlandyrý máseleleri boıynsha zańnamalyq túzetýlerdi birinshi oqylymda maquldady.
Negizgi zań jobasynda shaǵyn elektrli kólikter men kólikterdiń jekelegen túrleriniń qozǵalysyn baqylaý usynyldy. Bul mopedterdi paıdalanýǵa jáne qozǵalys erejelerin retteýge múmkindik beredi. Olardyń júrgizýshileri Ákimshilik quqyqbuzýshylyq týraly kodekste kózdelgen baptarǵa sáıkes tolyq jaýapkershilikke tartylady. Atalǵan norma mas kúıde moped tizgindegen júrgizýshiler sanyn, olardyń jol apattaryna túsýi men jaraqat alýyn azaıtýǵa baǵyttalǵan. Sondaı-aq Ákimshilik quqyqbuzýshylyq týraly kodekske engizilgen ózgerister moped júrgizýshilerin tolyq jol qozǵalysyna qatysýshylarǵa teńestirýdi kózdeıdi.
Moped júrgizýshilerinen talap etiletin sharttar:
- Mopedterdi basqarý úshin júrgizýshiler ýákiletti organda mindetti tirkeýden ótedi;
- «A1» sanatyndaǵy júrgizýshi kýáligin alady;
- Jyl saıynǵy tehnıkalyq baıqaýdan ótedi;
- Júrgizýshiler azamattyq-quqyqtyq jaýapkershilikti mindetti saqtandyrý rásiminen ótedi.
Budan basqa, jergilikti atqarýshy organdarǵa elektrosamokattardy paıdalaný tártibin anyqtaý ókilettigin berý qarastyrylyp otyr. Bul ákimdikterge ár óńirdegi jol ınfraqurylymyn damytý sharttaryna qaraı qozǵalys jyldamdyǵyn, ruqsat etilgen oryndardy jáne elektrosamokattardyń jumys tártibin anyqtaýǵa múmkindik beredi.
Jol erejesin buzǵandar 7 jylǵa deıin qujat ala almaıdy
Zań jobasy qabyldanǵannan keıin júrgizýshi kýáligi joq jáne ony almaı turyp kólik quralyn basqarǵan, sondaı-aq tizgin basynda alkogol nemese esirtki qoldanǵan tulǵalar jeti jylǵa deıin emtıhan tapsyrý múmkindiginen aıyrylady.
Qazir olar ákimshilik jazany ótep, emtıhandy ońaı tapsyryp júr, júrgizýshi kýáligin de ala alady. Osyǵan uqsas aıyptar boıynsha jaýapqa tartylǵan júrgizýshiler 7 jylǵa kólik júrgizý quqyǵynan aıyrylady.
Avtojoldarda ortasha jáne maksımaldy jyldamdyq engiziledi
Negizgi zań jobasyna kólik quraldarynyń ortasha jáne maksımaldy jyldamdyǵy uǵymdary engizilgen.
Bul túzetýler sertıfıkasııalanǵan arnaıy baqylaý-ólsheý quraldary men qurylǵylary ornatylatyn joldyń barlyq ýchaskesinde júrgizýshilerdiń jyldamdyǵyn tómendetýge, sondaı-aq jyldamdyqty shekten asyryp jiberýge baılanysty apattar sanyn azaıtýǵa baǵyttalǵan.
Bul rette «ortasha jyldamdyq» kórsetilgen qurylǵylar men quraldar arqyly joldardyń túzý ýchaskelerinde jáne aınalma joldary joq qala syrtynda avtomatty túrde esepteledi.
Qazirgi ýaqytta Ákimshilik quqyq buzýshylyq týraly kodekske sáıkes ereje buzýshylarǵa belgilengen jyldamdyqty asyrǵany úshin kelesi kólemde aıyppul belgilengen:
- saǵatyna 10-nan 20 shaqyrymǵa deıin – 5 AEK (18 460 teńge);
- saǵatyna 20-dan 40 shaqyrymǵa deıin – 10 AEK-ke (36 920 teńge);
- saǵatyna 40 jáne odan da kóp kılometrde – 20 AEK (73 840 teńge);
- jyl ishinde belgilengen mólsherde jyldamdyqty qaıta asyrǵany úshin – 30 AEK-ke (110 760 teńge).
Endi Ákimshilik quqyqbuzýshylyq týraly kodekske kólik quraldarynda belgilengen jyldamdyqty 60 jáne odan da kóp km/saǵatyna asyrǵany úshin 40 AEK kóleminde aıyppul túrindegi qatań ákimshilik jaýapkershilik engizý kózdelgen.
