Sýret: TJM
Osy saǵatta 18 651 adam óz úılerine oraldy. 6 932 adam, onyń ishinde 3 143 bala evakýasııalaý pýnktterinde qaldy. Sý tasqyny bastalǵaly beri barlyǵy 117 617 adam, onyń ishinde 43 887 bala qutqarylyp, evakýasııalandy. 113 852 aýyl sharýashylyq janýarlary qaýipsiz jerge aıdaldy.
10 mln astam tekshe metr erigen qar sýy soryp shyǵaryldy, 3,1 mln astam qapshyq jáne 1,4 mln astam tonna ınertti materıal tóseldi.
Aqmola, Aqtóbe, Qostanaı, Atyraý, Soltústik Qazaqstan oblystarynda 5 798 jeke turǵyn úı, 1 130 aýla aýmaǵy sý astynda qaldy.
Zardap shekken óńirlerge temirjol, avtomobıl kólikterimen jáne áýe kemelerimen 4 211 tonna gýmanıtarlyq kómek jetkizildi.
«Torǵaı ózeni sý deńgeıiniń kóterilýi qaýpine baılanysty Aqtóbe oblysy Yrǵyz aýdany Quılys aýylynyń turǵyndary aldyn ala evakýasııalandy. Yrǵyz aýdanynda jaǵalaýdy bekitý jáne gýmanıtarlyq kómek jetkizý jumystary júrgizilip jatyr. Torǵaı ózeniniń sý deńgeıine monıtorıng júrgiziledi», dedi QR TJM Azamattyq qorǵanys jáne áskerı bólimder komıtetiniń aǵa ofıseri Erasyl Saıpash.
Avarııalyq-qutqarý jáne sý tasqynyna qarsy jumystarǵa 43 976 adam, 4 633 tehnıka, 860 sý sorý quraly, 332 júzý quraly, 17 áýe kemesi jumyldyryldy.
