Júk kóligine tıelgen kómek Almatydan Oral qalasyna sáýirdiń 17-si kúni kelip jetti.
«Alataýdyń baýraıynan at terletip arnaıy keldik. Qurmanǵazy orkestri ujymy elimizde bolyp jatqan jaǵdaıǵa baılanysty aǵaıyndy sabyrǵa shaqyrady. Sonyń ishinde biz úshin Aqjaıyq óńiriniń orny erekshe ǵoı. О́nerkásippen, saýdamen aınalysatyn iri fırma, kompanııa emespiz, sonda da bolsa tasqyn sýdan zardap shegip jatqan halyqqa nıetimizdiń birligin bildirip, kómegimizdi jetkizip otyrmyz», deıdi orkestr artısi jáne ınspektory Rýslan Baımuhatov.
Gýmanıtarlyq kómektiń ishinde sý basqan óńirge asa qajetti qapshyq, kúrek, qaıyq, generator, sorǵy quraldary, tósek-oryn, balalar jaıalyqtary sekildi 18 tekshemetr júk bar eken. Barlyǵy qattalyp tirkelip, qoımaǵa túsirildi. Osy jerden tabıǵat apatynan zardap shegip jatqan turǵyndarǵa, evakýasııalyq beketterge, qorǵanys alańdaryna bólinip jóneltiletin bolady.
«Qazaq halqynyń birtutastyǵynyń dáleli – eldiń bir shetinde qıyndyq týyndap jatsa, kelesi qıyryndaǵylar bul máseleden shet qylmaı, kómek qolyn sozyp jatady. Aqjaıyq óńirine sý stıhııasy salmaq salǵanda, sonaý Jetisýden at arytyp kelip gýmanıtarlyq kómek kórsetip jatqan Qurmanǵazy atyndaǵy ulttyq aspaptar orkestri ujymynyń qoldaýyna qalaı razy bolmaısyń! Mádenıet salasynyń jaǵdaıy asa shylqyp turmaǵanyn bilemiz. Sondyqtan qaltasynan qarajat shyǵaryp, kómek kórsetip jatqan óner ujymyna alǵysymyz sheksiz», deıdi Batys Qazaqstan oblystyq qoǵamdyq keńes múshesi, Parlament Májilisiniń depýtaty Abzal Quspannyń senimdi ókili Nurlan Sádir.
Batys Qazaqstan oblysy
