Foto: Polisia.kz
Almaty qalasynyń kóshi-qon qyzmeti bıyl qalaǵa 23 myńǵa jýyq shetel azamaty kelgenin habarlady.
«Almaty – ınfraqurylymy damyǵan, ózindik mádenıeti bar shahar, sondyqtan alys jáne jaqyn elderden kelgen adamdardyń qyzyǵýshylyǵyn tez oıatady. Kóshi-qon aǵyny jyl saıyn artyp keledi. Bul ekonomıkaǵa oń áserin tıgizse, qylmystyq jaǵdaıǵa keri áserin tıgizip jatyr. Dálirek aıtqanda, quqyq buzýshylyq sany ósip jatyr. Aýyr qylmystar da tirkeledi. Máselen, Almatynyń Túrksib aýdanynda shetel azamaty óziniń tanysyn óltirgen. Al Medeý aýdanynda Úndistan men Pákistannyń eki azamaty sıntetıkalyq esirtki óndiretin zerthana uıymdastyrǵan. Al sheteldik stýdentter kóshede jıi tóbelesip jatady», dedi Almaty qalalyq PD kóshi-qon qyzmeti basqarmasynyń bastyǵy Ashat Býtýnchınov.
Onyń aıtýynsha, Almatyda Qazaqstan Respýblıkasynyń kóshi-qon zańnamasyn buzý faktilerin anyqtaý boıynsha is-sharalar turaqty túrde júrgiziledi. Jyl basynan beri Qazaqstannyń kóshi-qon zańnamasyn buzǵany úshin segiz myńnan astam adam ákimshilik jaýapkershilikke tartylsa, onyń tórt myńǵa jýyǵy - shetel azamattary. Nátıjesinde, sot sheshimimen 682 sheteldik Qazaqstan aýmaǵynan shyǵaryldy.
Qyrmyzy JUMAǴALIQYZY,
EUÝ stýdenti
