foto: Midjourney neırondyq jelisi arqyly jasalǵan keskin
Sot tergeýi jabyq túrde ótip jatqanyn eskere otyryp, oqıǵanyń qysqasha mazmunyn usynyp otyrmyz. Zań boıynsha keıbir málimetter jarııa etýge jatpaıdy.
2017 jyldyń sońynda almatylyq Ánel (aty ózgertildi) korporatıvtik keshte áriptesimen tanysady. Zańgerdiń aıtýynsha, olar ártúrli uıymdarda jumys istegenimen, bir ǵımaratta júrgen. Qyz ben jigittiń arasynda dostyq qarym-qatynas bastalǵan. Er adam úılengen bolyp shyǵady. Aqyrynda, uzaq qarym-qatynastan keıin ol qyzdy serýendeý úshin taýǵa alyp ketedi jáne sol jerde jynystyq zorlyq jasaıdy. Osydan keıin qyz jigittiń ústinen aryz jazyp, oqıǵaǵa baılanysty qylmystyq is qozǵalady.
Osy oqıǵalardan keıin Ánel Birikken Arab Ámirlikterine ketedi. Boıjetken Dýbaıdaǵy bes juldyzdy qonaqúılerdiń birine jumysqa ornalasady.
«Qyz óte bilimdi, eki joǵary bilimi bar, aǵylshyn tilin joǵary deńgeıde meńgergen. Ol jumysqa ornalasý týraly áńgimelesýden ońaı ótti, onymen kelisimshart jasaldy. Qyzmet kórsetý salasynda jumys isteý úshin medısınalyq komıssııadan, medısınalyq tekserýden, áńgimelesýden, testileýden ótti. Mine, ol sonda jumysqa ornalasty, ketip qaldy biraq odan keıin baılanysqa shyqpady», deıdi advokat.
Keıinirek Ánel Instagram jelisinde óziniń geolokasııasyn belgilep, sýretin jarııalaıdy. Nátıjesinde er adam qyzdyń izine túsedi.
Ǵalym Nurpeıisovtyń aıtýynsha, 2019 jyly er adam Áneldi áleýmettik jelide geolokasııa arqyly baqylap, oǵan qoqan-loqqy habarlamalar jaza bastaǵan.
«Er adam qyzdy óltirgisi kelgen, ol Instagram-da: «Ne sen qaıtyp kelesiń, ne ary qaraı ómir súrmeısiń» dep jazkdy, qyz oralýdan bas tartqannan keıin ol ózi BAÁ-ǵa barǵan», dedi advokat.
Eski tanysynyń izine túskenin bilgen boıjetken týystary men BAÁ-degi Qazaqstan konsýldyǵyna habarlasqan.
«Ol Qazaqstan konsýldyǵyna bul adamnyń qaýip tóndiretinin aıtyp, qorqatynyn aıtty», dedi.
Advokattyń aıtýynsha, qýǵynshy Dýbaıǵa úlken bos chemodanmen ushyp kelgen.
«Er adam qyzdyń izine túsip, ol jumys isteıtin qonaqúıdegi páterine kirip qyzdy óltiredi. Máıitti chemodanǵa salyp, jaldamaly kólikpen shól dalaǵa aparyp tastaǵan», dedi advokat.
Qyzdyń denesin jergilikti turǵyndar 2019 jyldyń 18 sáýirinde taýyp alyp, polısııaǵa habarlaǵan.
«Osydan keıin polısııa kelip, saraptama júrgizildi, ólimniń sebebi anyqtaldy. Birikken Arab Ámirlikteriniń tergeýshileri qylmystyń qasaqana jasalǵanyn anyqtady», dedi advokat.
Ol marqumnyń denesin tasymaldaý úshin shamamen 25 myń dollar qajet bolǵanyn atap ótti. Áneldiń týystarynda qajetti soma bolmaǵandyqtan, ony kremasııalap, kúli Qazaqstanǵa jetkizildi. Sondyqtan sot-medısınalyq saraptamany BAÁ-niń jergilikti bıligi ǵana júrgize aldy.
Tergeýshilerdiń aıtýynsha, qylmys jasalǵannan keıin kelesi kúni aıyptalýshy Qazaqstanǵa oralyp, jasyrynyp úlgergen. Tártip saqshylary ony uzaq izdedi. Osy ýaqyt boıy bul isti Dýbaı polısııasy tergep jatqan.
Zardap shekken taraptyń advokaty Ǵalym Nurpeıisovtiń ózi Dýbaıǵa baryp, oqıǵa ornyna jáne qaza tapqan qazaqstandyq áıeldiń denesi tabylǵan jerge baryp, jergilikti tergeýshilermen sóılesken.
Kúdiktini uzaq izdestirý jáne tergeý áreketterinen keıin 2024 jyldyń naýryz aıynyń sońynda Dýbaıda qazaqstandyq áıeldi óltirý isi Almaty sotyna jiberildi.
«Marqumnyń anasynyń málimdemesi jáne konsýldyq qyzmettiń rastaýynyń negizinde adam óltirý faktisi boıynsha qylmystyq is qozǵaldy, uzaq hat almasýdan keıin BAÁ is materıaldaryn aǵylshyn jáne orys tilderinde Qazaqstanǵa jiberdi. Qazirgi qylmystyq istiń negizin quraǵan materıaldar birinshi zorlaý isin qamtydy», dedi Ǵalym Nurpeıisov.
Qylmystyq kodekstiń 120-baby «Zorlaý» baby boıynsha sot otyrysyn jabyq ótkizý týraly sheshim qabyldandy.
Sondaı-aq kúdiktige Qylmystyq kodekstiń 99-baby 2-bóliginiń 5-tarmaǵy «Asa qatygezdikpen kisi óltirý» boıynsha aıyp taǵylyp otyr.
О́z kezeginde advokat qylmyskerdi ómir boıyna bas bostandyǵynan aıyrý úshin qoldan kelgenniń barlyǵyn jasaıtynyn atap ótti.
Aıta keteıik, qylmystyq iske qatysty aqparatty Qazaqstannyń Joǵarǵy soty rastady.
«Dýbaıda (BAÁ) qazaqstandyq áıeldi óltirýge qatysty qylmystyq is Qylmystyq kodekstiń 120-babynyń 1-bóligi «Zorlaý» jáne 99-baby 2-bóliginiń 5-tarmaǵy «Asa qatygezdikpen jasalǵan kisi óltirý» boıynsha qaralyp jatyr. Sot otyrysy "jarııalylyq" talaptaryna sáıkes jabyq rejımde júrgiziledi», dep habarlady Joǵarǵy Sot.
Ǵalym Nurpeıisov BAÁ Qazaqstan azamatyn sol jerde sottaýy úshin ony ekstradısııalaýdy suraǵanyn aıtty. Ámirlikterde mundaı qylmys jasaǵandar ólim jazasyna kesiledi. Biraq zań boıynsha Qazaqstan óz azamattaryn basqa elde sotta qaraý úshin ekstradısııalamaıdy.
