Memleket basshysy elimiz úshin búgingideı jaýapty kezeńde ulttyń birligi men yntymaǵyn nyǵaıtý asa mańyzdy ekenin atap ótti. QHA ókilderine Qazaqstannyń birqatar óńirinde bolǵan alapat sý tasqynynyń saldaryn joıýǵa belsendi qatysqany úshin alǵys bildirdi. Qazir Assambleıanyń myńdaǵan eriktileri tótenshe jaǵdaıdyń zardabyn joıý jumystaryna kómektesip jatyr.
Qasym-Jomart Kemeluly atap ótkendeı, tasqynnan zardap shekkenderdiń bárine memleket tarapynan tıisti kómek pen qoldaý kórsetiledi. Eshkim nazardan tys qalmaıdy. Bıznes ókilderi de belsendi kómek kórsetip jatqanyn atap ótken jón.
Sessııa barysynda Qazaqstan halqy Assambleıasynyń etnosaralyq kelisimdi nyǵaıtýda, qoǵamda tolernattylyq, beıbitshilik jáne tatýlyq qundylyqtaryn dáripteýde erekshe ról atqaratyny aıtyldy.
Bul tıimdi ári halyqqa baǵdarlanǵan ekonomıka men demokratııalyq saıası júıe qurýǵa arnalǵan aýqymdy ekonomıkalyq, áleýmettik jáne saıası reformalar júzege asyrylyp jatqan qazirgi kezeńde óte ózekti.
Búginde elimiz ondaǵan jyldar boıy túrli salada qordalanyp qalǵan kóptegen problemany sheship jatqany belgili. Osy oraıda qoǵamdaǵy tatýlyq, turaqtylyq jáne ózara túsinistik kózdegen maqsattarǵa qol jetkizýdiń negizgi sharttary ekeni anyq.
Bul ásirese, búgingideı kúrdeli geosaıası ahýal kezinde aıryqsha mańyzdy bolyp otyr. Qazir keıbir elder arasynda janjal men qaqtyǵystardyń ýshyǵa túskenin kórip otyrmyz. Muny belgili bir kúshter ózderiniń radıkaldy ıdeologııasyn nasıhattap, ksenofobııany qozdyrý úshin paıdalanady. Osyndaı jaǵdaıda Qazaqstan ózara túsinistikke, dıalogke jáne kez kelgen sıpattaǵy radıkalızm men ekstremızmge múldem tózbeýshilikke baǵyttalǵan kún tártibin dáıekti túrde dáriptep keledi.
Sonymen qatar Memleket basshysy aýqymdy reformalardy iske asyrýda jastar aıryqsha ról atqaratynyn aıtty.
Erkin, kreatıvti, jańa ıdeıalarǵa ashyq, eńbekqor, tolerantty azamattar arqyly ǵana ulttyń jasampaz áleýeti júzege asady.
Sondyqtan óskeleń urpaqtyń boıyna durys qundylyqtardy sińirý, olardy memlekettik tilge jáne halqymyzdyń tarıhy men dástúrine qurmetpen qaraýǵa tárbıeleý asa mańyzdy. Bul rette jas býyn tarıhqa qatysty ókpe-renishterden, dogmatızmnen jáne eskirgen mádenı stereotıpterden ada bolýy kerek.
Qazaqstan halqynyń osyndaı jańa býynyn tárbıeleýde Assambleıanyń atqaratyn róli zor.
Prezıdentimiz nashaqorlyqtyń, qumar oıyndardyń, turmystyq zorlyq-zombylyq pen vandalızmniń zııany men saldaryna taǵy bir márte toqtaldy. Qazirgi tańda bul keselderge qarsy turý úshin aýqymdy jumys júrgizilip jatyr. Osy baǵytta memleket pen qoǵamdyq ınstıtýttar, ásirese, Qazaqstan halqy Assambleıasy judyryqtaı jumylýy qajet.
Sessııa barysynda Memleket basshysy Qazaqstan halqy Assambleıasynyń gýmanıtarlyq áleýetin damytý jóninde jańa mindetter júktedi. 2025 jyly Assambleıanyń qurylǵanyna 30 jyl tolady. Bul ataýly data mańyzdy áleýmettik jobalar men bastamalardy iske asyrýǵa tyń serpin beretini anyq.
Qazir Parlament Senatynyń depýtattary Prezıdentimiz belgilep bergen mindetterdi iske asyrýǵa belsendi atsalysyp keledi. Barlyq zań eldegi tynyshtyq pen kelisimdi qamtamasyz etý turǵysynan jan-jaqty saraptalady. Assambleıadan saılanǵan depýtattar basqa áriptesterimen birge Qazaqstanda turatyn barlyq etnostardyń mádenı-gýmanıtarlyq múddelerin eskere otyryp, jumys isteıdi.
Senat aldaǵy ýaqytta da Memleket basshysynyń elimizdegi beıbitshilik pen kelisimdi qamtamasyz etýge arnalǵan saıasatyn belsendi túrde qoldap, ádiletti, demokratııalyq jáne turaqty Qazaqstan qurýǵa arnalǵan keshendi reformalardy iske asyrý úshin quqyqtyq negiz qalyptastyrýdy jalǵastyra beredi.
Máýlen ÁShIMBAEV,
Parlament Senatynyń tóraǵasy
