Foto: Ashyq derekkózden
Almaty qalasynyń qylmystyq ister jónindegi mamandandyrylǵan aýdanaralyq sotynda QR Qylmystyq kodeksiniń 351-babynyń 3-bóligi jáne 293-babynyń 1-bóligi boıynsha Darhan Ahmetjanovqa qatysty qylmystyq is qaraldy.
32 jastaǵy D.Ahmetjanovqa abaısyzda 2 nemese odan da kóp adamnyń ólimine ákep soqqan buzaqylyq jáne kólikti qaýipsiz paıdalanýdy qamtamasyz etý erejelerin buzý (QR QK-niń 293-baby 1-bóligi, 351-bap 3-bóligi) boıynsha aıyp taǵyldy. Búgin istiń núktesi qoıyldy.
«Qaıǵyly oqıǵa Almatyda 2023 jyldyń jeltoqsanynda boldy, D.Ahmetjanov áıel adam basqarǵan avtobýsqa minip, jol aqysyn tóleý týraly zańdy talabyna agressııamen jaýap bergen. Janjal kezinde D.Ahmetjanov avtobýsty ruqsat etilmegen jerde toqtatýdy talap etip, júrgizýshiniń bas tartýynan keıin onyń betinen eki ret urǵan. Ol esin joǵaltyp, kólikti basqara almaı qalǵan. Saldarynan avtobýs jol jıeginde turǵan adamdardy qaǵyp ketken. Jol apaty saldarynan úsh adam oqıǵa ornynda kóz jumyp, taǵy bir adam zardap shekti. Sottalýshynyń kinási zattaı aıǵaqtarmen, saraptama qorytyndysymen jáne beınebaqylaý kamerasyndaǵy beınematerıaldarmen dáleldendi», delingen Joǵarǵy Sot habarlamasynda.
D.Ahmetjanov abaısyzda eki jáne odan da kóp adamnyń ólimine ákep soqqan buzaqylyq jáne kólikti qaýipsiz paıdalanýdy qamtamasyz etý erejelerin buzǵany úshin kináli dep tanyldy. Ol 8 jylǵa bas bostandyǵynan aıyryldy.
Sottalýshydan jábirlenýshi K.-nyń paıdasyna 6 397 250 teńge materıaldyq shyǵyndy jáne 5 000 000 teńge moraldyq shyǵyndy óndirý týraly qaýly qabyldandy.
Sondaı-aq jábirlenýshi B.-nyń paıdasyna 10 000 000 teńge moraldyq shyǵyn óndiriledi.
Úkim zańdy kúshine engen joq.
Sot prosesinde aıyptalýshy óziniń kinásin buzaqylyq baby sheńberinde ǵana moıyndady.
Joǵarǵy Sot bul prosesti áleýmettik jelidegi paraqshalary arqyly onlaın kórsetti.
(Foto: Joǵarǵy Sot)
