Aımaqtyq qaýipsizdiktiń tiregi

Halyqaralyq deńgeıdegi otyrysqa Úndistan, Iran, Qytaı, Qyrǵyz Respýblıkasy, Pákstan, Reseı, Tájikstan, О́zbekstan qorǵanys salalarynyń basshylary qatysty. Sonymen qatar is-sharaǵa Shanhaı yntymaqtastyǵy uıymynyń Bas hatshysy, ShYU Aımaqtyq terrorızmge qarsy qurylymy Atqarýshy komıtetiniń dırektory jáne Belarýs Qorǵanys mınıstri qurmetti qonaq retinde shaqyryldy.

Aıta keteıik, bıyl Iran keńeske uıymnyń tolyq múshesi retinde alǵash ret qatysty. Sondaı-aq osy jyly ShYU-ǵa Belarýs eli de qosylady dep kútilip otyr.

Jyldan jylǵa órisi keńeıip kele jatqan uıymǵa elimizdiń tóraǵalyǵy aıasynda negizgi kóńil bólinetin máseleler ishinde ekologııa salasy da bar. 2024 jyl Qazaq eliniń bas­ta­ma­symen ShYU Ekologııa jyly bolyp jarııalanǵanyn aıta keteıik.

Elordamyzǵa at basyn tiregen Shanhaı yntymaqtastyǵy uıymyna múshe memleketter Qorǵanys mınıstrleriniń keńesi­ne qatysýshylar eń aldymen ekologııa­lyq aksııaǵa qatysyp, elimizdiń Qorǵanys mı­nıstrligi ǵımaratynyń janyna kóshet otyr­ǵyzý rásimin jasady. Sonymen birge shetel­dik delegasııalardyń nazaryna Keńes Odaǵy­nyń batyry, Halyq qaharmany, táýelsiz Qazaqstannyń tuńǵysh Qorǵanys mınıstri, armııa generaly Saǵadat Nurmaǵambetovtiń 100 jyldyǵyna arnalǵan murajaı ekspozısııasy usynyldy.

Is-sharany elimizdiń Qorǵanys mınıstri, general-polkovnık Rýslan Jaqsylyqov ashyp, keńestiń óńirlik, halyqaralyq qaýipsizdiktiń ózekti máseleleri boıynsha pikir almasý jáne odan ári yntymaqtastyq perspektıvalaryn talqylaý alańy retindegi róline toqtaldy. Ol Shanhaı yntymaqtastyǵy uıymynyń qurylýy men damýy óńirdegi beıbitshilikti, qaýipsizdik pen turaqtylyqty saqtaý isine mańyzdy úles qosatynyn atap ótti.

Keshe sondaı-aq halyqaralyq is-shara aıasynda uıymǵa qatysýshy memleketter delegasııalary basshylarynyń birqatar ekijaqty kezdesýi ótti.

Aıta keteıik, Shanhaı yntymaqtastyǵy uıymy 1996 jyly «Shanhaı bestigi» dep ataýmen qurylǵan. Eń alǵashqyda onyń quramyna Qazaqstan, Qyrǵyz Respýblıkasy, Qytaı, Reseı, Tájikstan kirgen. 2001 jyly uıymǵa О́zbekstan qosylǵannan bastap Shanhaı yntymaqtastyq uıymy degen atpen turaqty jumys istep kele jatqan úkimetaralyq uıym. Múshe-memleketter arasynda ózara senim men dostyq, tatýlyq qarym-qatynastardy nyǵaıtý, saıası, saýda-ekonomıkalyq, ǵylymı-tehnıkalyq, bilim berý, qýat kózi, kólik, ekologııalyq jáne ózge de salalarda tıimdi áriptestik sharalaryn damytý, sondaı-aq ortaq kúsh jumsap aımaqtyq beıbit ómirdi, qaýipsizdik pen turaqtylyqty qamtamasyz etý, demokratııalyq, ádil jáne utymdy saıası, ekonomıkalyq halyqaralyq tártip ornatýǵa jaǵdaı jasaýdy maqsat tutqan halyqaralyq uıymǵa bıyl bizdiń elimiz tóraǵalyq etedi.