27 myńnan astam jambyldyq qalalar men aýyldardy kógaldandyrýǵa óz úlesterin qosty, onyń ishinde kásiporyn men áleýmettik nysannyń 5 222 qyzmetkeri bar. Aýmaqty abattandyrý boıynsha 60 tarıhı-mádenı eskertkish, 143 saıabaq, 1400-ge jýyq aýla, 8300 sý júıelerinde tazartý jumystary júrgizildi.
Oblys boıynsha bıyl abattandyrý, kógaldandyrý jáne sanıtarlyq tazalaý jumystaryna 9,4 mıllıard teńge bólindi. Búgingi tańda 57 100 kóshet otyrǵyzyldy, 809,4 shaqyrym aryq jáne kanal, 3 102 shaqyrym kóshe, 1,1 mıllıon sharshy metr saıabaq pen skver aýmaǵy tazartyldy, 4 280 tonna qoqys shyǵaryldy. 53 sýburqaqty iske qosý sharalary qolǵa alyndy. Bul baǵyttaǵy jumystardy nátıjeli jalǵastyrý úshin 25 birlik tehnıka satyp alý josparlanǵan.
Sondaı-aq oblys boıynsha 469,6 shaqyrym jol jóndeledi. 228 kóshe (Tarazda 76 kóshe) jaryqtandyrylady. Bıyl oblys ortalyǵyndaǵy 10 shaǵyn aýdan men Qarasý turǵyn alqabynyń aýlalary tolyǵymen jaryqpen qamtylady.
О́ńir basshysynyń aıtýynsha, qazirgi kezde aǵashtardy túgendeý jumystary júrgizilip jatyr. Osy málimetter negizinde utymdy sýarý júıesin uıymdastyrýǵa kómektesetin dendrokarta jasalmaq.
«Memleket basshysynyń tapsyrmasyna sáıkes qala ınfraqurylymyn jaqsartý boıynsha keshendi jumystar qolǵa alynǵan. Prezıdent qalalardy laıyqty jáne tartymdy jaǵdaıda ustaý mádenıetin engizýdiń mańyzdylyǵyn atap ótti.
Aýyl turǵyndary, memlekettik mekemelerdiń qyzmetkerleri, etnomádenı birlestikterdiń, bıznes ókilderi, stýdentter ekologııalyq aksııaǵa belsendilikpen qatysyp jatyr», deıdi oblys ákimi.
Erbol Qarashókeev abattandyrý jáne kógaldandyrý jumystary áleýmettik nysandar men ınfraqurylym salý jobalarynyń ajyramas bóligi bolýy tıis dep esepteıdi.
Osy jyly oblysta 56 kópqabatty turǵyn úıdiń (2 909 páter) qurylysyna 12,3 mıllıard teńge bólingen. Jyl qorytyndysy boıynsha 54 úı (2 749 páter) paıdalanýǵa beriledi.
Halyqtyń áleýmettik osal toptary úshin 1 575 páter satyp alý josparlanǵan (respýblıkalyq bıýdjetten, «Samuryq-Qazyna» qory). Budan bólek, 14,2 myń orynǵa arnalǵan 41 bilim berý, 24 densaýlyq saqtaý nysanynyń, 15 dene shynyqtyrý-saýyqtyrý kesheniniń qurylysy bastalady.
Erbol Qarashókeevtiń aıtýynsha, óńirdegi aýmaqtardy kógaldandyrý jáne abattandyrý jónindegi ekologııalyq naýqan júıeli túrde jalǵasady.
