Aýyzsý mólsherin arttyratyn joba

Oblys ortalyǵy Aqtaý qalasynan 50 shaqyrym jerde, Munaıly aýdany aýmaǵynda ornalasqan «Quıylys» jerasty sýlary ken ornyndaǵy stansa Mańǵystaý atom energetıkalyq kombınatynyń ortalyq sýmen jab­dyqtaý torabyna (OSJT-1) úzdiksiz sý jetkizýdi júzege asyrady. Qazirgi tańda 30-dan asa adamdy jumyspen qamtyp otyrǵan stansa ótken ǵasyrdyń 60-jyldarynan beri jumys istep keledi. Uzaq jyldar boıy jabdyqtary jańartylmaǵan ken ornyndaǵy eski qubyrlardy rekonstrýksııalaý ju­mystary qolǵa alyndy. Aq­taý qala­sy­nyń turǵyndaryn sýmen qamtyp, ortalyq sýmen jabdyqtaý torabyna túsetin tehnıkalyq sý kólemin ul­ǵaıtý úshin, sondaı-aq «Kaspıı» sý tushy­tý zaýytyn sýmen qamtamasyz etý maq­sa­tyn­da «Alıans-LTD» JShS uzyndyǵy 46 shaqyrym qubyrdy rekonstrýksııalady.

– Qazirgi tańda jalpy uzyndyǵy 46 shaqyrym ýchaskede 28 shaqyrym qubyr ornatyldy. «Quıylys» ken ornynan Mańǵystaý atom energetıkalyq kombınatyna jáne «Kaspıı» sý tushy­tý zaýytyna deıin tartylatyn sý quby­ry rekonstrýksııalanyp bitken soń oblys ortalyǵyndaǵy tehnıkalyq sý­dyń kólemi edáýir artady, – deıdi Mań­ǵys­taý oblysynyń energetıka jáne tur­ǵyn úı-kommýnaldyq sharýashylyq bas­qar­masynyń basshysy Ábdesh Túrikmenbaev.

Atalǵan jobanyń quny shamamen 18,4 mlrd teńgege baǵalanady. Jobany iske asyrýǵa 2024 jyly respýblıkalyq bıýd­jetten qosymsha 5,5 mlrd teńge jáne jergilikti bıýdjetten 1,8 mlrd teń­ge bólindi. Sondaı-aq Mańǵystaý ob­lysynyń energetıka jáne turǵyn úı-kom­mýnaldyq sharýashylyq basqarmasy Sý resýrstary jáne ırrıgasııa mınıstr­ligine 5,1 mlrd teńge kóleminde qosymsha qarajat bólýge bıýdjettik ótinim berdi. Sý qubyryn rekonstrýksııalaý jónin­degi joba ýaqtyly qarjylandyrylsa, jumystar 2024 jyldyń jaz aılarynda aıaqtalady degen jospar bar.

Qys bolsa jylýdyń, jaz bastalysymen aýyzsýdyń aıqaıy bastalatyn Aqtaýda aýyzsý kólemin arttyrýǵa sál de bolsa sebi tıetin jobanyń ýaqytyn­da qarjylandyrylmaı, qarajattan qaǵylýy múmkin emes. Bul – eldik másele.

Mańǵystaý oblysy