Marafon Qazaqstan halqynyń birligi kúni qarsańyna arnaıy uıymdastyryldy. Oǵan Qazaqstan halqy Assambleıasy bastamashy boldy. Sondaı-aq Astana qalasynyń trıatlon federasııasy men Týrızm jáne sport, Mádenıet jáne aqparat mınıstrlikteri de uıytqy boldy.
– «Birlik júgirisi» – Qazaqstan halqy Assambleıasynyń «Biz ártúrlimiz, biraq teńbiz» qaǵıdasyn negizge aldy. Munyń bári mereke qarsańynda halqymyzdyń birligin nyǵaıtýǵa, yntymaǵymyzdy kórsetýge, salamatty ómirdi qalyptastyrýǵa úlesimiz dep sanaımyz. Jarysqa 15 myń adam qatysyp otyr, elimizde mundaı kólemde júgiris buryn-sońdy bolǵan emes. Sondyqtan is-sharany endi jyl saıyn ótkizýdi oılastyramyz, – dedi QHA tóraǵasynyń orynbasary Marat Ázilhanov.
Elordada tańǵy 7:00-de bastalǵanyna qaramastan, 2 myńǵa jýyq adam jarys jolyna shyqty. Júgirý básekesine qala turǵyndarymen qatar, Parlament depýtattary, Astana qalasy ákiminiń orynbasary Eset Baıken, Astana qalasynyń Dene shynyqtyrý jáne sport basqarmasynyń basshysy Vasılıı Levıt, respýblıkalyq jáne astanalyq etnomádenı birlestikterdiń, jastar jáne eriktiler uıymdarynyń, sport federasııalarynyń, júgirý klýbtarynyń ókilderi qatysty. Aıta keterligi, bıyl alǵash ret jas sportshylar bir shaqyrym qashyqtyqqa jarysty.
– Ata-anam jeńil atletıkamen kásibı túrde aınalysady. Árıne, men de olardan qalys qalmaımyn. Jarystarda óz qatarlastarymmen birge saıysqa túsken unaıdy. Men úshin jeńimpaz bolý mindetti emes. Ýaqytqa da qaramaımyn. Bastysy – júgirýden lázzat alamyn, – dep, 9 jastaǵy Markýs atty jas qatysýshy óz oıyn bildirdi.
Márege jetkenderdiń barlyǵyna estelik medal berildi. Al jeńimpazdar jas sanattary boıynsha baǵaly syılyqtarmen marapattaldy. Jarys aıasynda barlyq qajetti qaýipsizdik sharalary qamtamasyz etilip, kásibı mamandar tóreshilik etti.
– Salamatty ómir saltyn nasıhattaý maqsatynda elordamyzda eresekterden 1 500, balalardan 300-deı qatysýshy jınaldy. Byltyrǵy jarysymyzda tek 500 metr, 2,5 jáne 5 shaqyrymdy qurap, 250-deı ǵana sportshy jarysqan edi. Endi kórip otyrǵanymyzdaı, 1 jyldyń ishinde 10, 21 shaqyrymdy da qosyp, qatysýshylardyń qatary 6-7 esege artty. Eresekterden bólek, 6-17 jastaǵy balalar 1 shaqyrym júgiredi. Bul – jaqsy dástúr. О́ıtkeni bala ata-anasynyń aıtqanyn emes, kórgenin isteıdi. Taǵy bir jaqsy jańalyǵymyz – trassa halyqaralyq jeńil atletıka federasııasy tarapynan moıyndalǵan. Iаǵnı osy kórsetkishpen ózge de iri halyqaralyq marafonda baq synaýǵa bolady. Munymen toqtap qalmaımyz. Keler jyly tolyqqandy 42,1 shaqyrymdy engizsek deımiz, – dedi Astana qalasy trıatlon federasııasynyń prezıdenti Evgenıı Bolgert.
Is-shara sońynda qatysýshylar «Taza Qazaqstan» aksııasy aıasynda sol mańdaǵy qoqystardy tazalap ketti.
– Aınalamdaǵy dostarym júgirýge yqpal etti. Olar: «Júgirýdiń esh qıyndyǵy joq, arnaıy zaldy qajet etpeıdi. Kez kelgen ýaqytta aıaqkıim kıip, bastaı beresiń» degennen keıin, júgirýge bel býdym. Sáýir aıynda eń alǵash qolǵa alyp, 5 shaqyrymǵa tirkeldim. Qorqynysh boldy. Márege jete almaı, uıat bola ma dep oıladym. Qudaıǵa shúkir, 35 mınýtqa jetkizbeı, qashyqtyqty baǵyndyrdym. Osynyń ózi jetistik bolǵanymen, 20-25 mınýtta júgiretinderge qyzyǵyp, men de osylar sekildi bolsam degen josparym bar. Salamatty ómir saltyn ustanýmen qatar, «Taza Qazaqstan» aksııasynda aınaladaǵy qoqystardy da jınaýǵa óz úlesimdi qostym. Erte turǵannyń nátıjesinde qoǵamǵa da septigimdi tıgizdim dep oılaımyn, – dedi Astana qalasynyń turǵyny О́rken.
