Omyrtqasy aýyratyn naýqastardyń azabyn azaıtatyn gadjet týraly málimet bergen aýrýhana neırohırýrgııa bólimshesiniń meńgerýshisi Marat Almatov mundaı zamanaýı neırostımýlıatorlar elimizde buryn-sońdy qoldanylmaǵanyn aıtady. Júıe Vanta SureScan MRI Medtronic dep atalady.
– Stımýlıatorlar – omyrtqasy sozylmaly dertke dýshar bolǵan pasıentter úshin taptyrmas qurylǵy. Operasııadan keıin olar aýrýyn umytyp, birden burynǵy qalypty ómirge oralady. Vanta SureScan MRI Medtronic – eń sońǵy úlgidegi, jetildirilgen, aqyldy júıe. Biz buryn ornatyp júrgen qurylǵy ýaqyt óte kele aýyrsynýdy basý qabiletinen aıyrylyp qalatyn. Onyń ústine bul stımýlıator pasıentke avtomatty túrde rettep, deneni kez kelgen qalypta ustaýǵa múmkindik beredi. Buǵan deıin emdelýshiler dene qalpyn ózgertkende aýyrsynýdy sezinetin, – deıdi dáriger.
Ekiniń biri qoly jete bermeıtin mundaı qurylǵynyń is júzinde synap kórý baqyty kóp jyldan beri omyrtqanyń degeneratıvti aýrýyna shaldyqqan, shalǵaıdan kelgen eki turǵynǵa buıyrǵan. Emdelýshiniń ekeýinde de Failed Back Surgery Syndrome – FBSS-pen baılanysty sozylmaly neıropatııalyq aýyrsyný paıda bolyp, naýqas jandardyń qozǵalýy qıynǵa soqqan. Ekeýine de aımaqta buǵan deıin tórt ret sátsiz operasııa jasalǵan eken.
– Operasııa 2 saǵatqa sozyldy. Biz neırostımýlıatorlardy shaǵyn tilik arqyly dál julynnyń ústine ornattyq. Pasıent oıanǵannan keıin birden júıeni iske qostyq. Emdelýshilerge arnaıy qosymsha ornatylǵan smartfon beriledi. Ol arqyly qurylǵyny qajet kezde rettep, qosyp nemese óshirýge bolady, – deıdi M.Almatov.
Jańa júıede «gıroskop» fýnksııasy bar, baǵdarlama soǵan tigilgen jáne ony smartfonnyń ne planshettiń kómegimen basqarýǵa bolady. Onda omyrtqanyń kez kelgen qalpyn baǵdarlaýǵa bolady. Gıroskop bul júıede omyrtqanyń kez kelgen qalpyn avtomatty túrde tanıdy. Júıeniń taǵy bir artyqshylyǵy – stımýlıator naýqasta ómiriniń sońyna deıin qalady. Pasıent operasııadan keıin qalypty ómir súrýge múmkindik alady.
Mamandarymyz ozyq medısınalyq qurylǵyny aǵzaǵa ornatýdy álemniń myqty neırohırýrgteriniń biri Vladımır Alekseevestiń sheberlik dárisi kezinde úırengen. Vladımır Alekseeves – Mınsk qalasyndaǵy Belarýs ulttyq neırohırýrgııa ortalyǵynyń ǵylymı jetekshi mamany.
ALMATY
