Bıyl ǵasyrlyq mereıtoıyn atap ótetin, jýrnalıster «sport basylymdary arasyndaǵy BUU-nyń Bas Assambleıasy» dep atap ketken AIPS kongresi jyl saıyn túrli elderde rotasııalyq negizde ótkiziledi.
1924 jyly qurylǵan AIPS – sport taqyrybyna mamandanǵan jýrnalısterdiń halyqaralyq kásibı uıymy. Qazirgi ýaqytta onyń 100-den astam elden 8000-ǵa jýyq múshesi bar. Osy joly 96 elden kelgen 230-dan astam delegat sport basylymdary forýmyna qatysty.
86-AIPS kongresi aıasynda Qazaqstan delegasııasy 2024 jylǵy 8-14 qyrkúıek aralyǵynda Astanada ótetin V Dúnıejúzilik kóshpeliler oıyndaryn tanystyrdy.
Delegasııa Dúnıejúzilik kóshpeliler oıyndardyń basty mıssııasy – álemdik etnosport qozǵalysyn damytý, jahandaný dáýirinde tarıhı-mádenı murany jáne álem halyqtarynyń alýan túrliligin saqtaý, etnosport túrlerin, álem halyqtarynyń dástúrli oıyndary men saıystaryn halyqaralyq arenada nasıhattaý, dinaralyq jáne mádenıetaralyq dıalogti, álem halyqtary arasyndaǵy ózara túsinistik, dostyq pen kelisimdi nyǵaıtý ekenin túsindirdi. Qatysýshylarǵa Qazaqstan bıliginiń bul is-sharaǵa erekshe mán beretini de aıtyldy. Kongress qatysýshylar tanystyrylymdy zor yqylaspen tyńdady.
Halyqaralyq sport basylymdary qaýymdastyǵynyń prezıdenti Djovannı Merlonyń pikirinshe, «Astanada Dúnıejúzilik kóshpeliler oıyndaryn ótkizý Uly dalanyń ǵasyrlar boıǵy biregeı mádenıetimen tanysýǵa qolaıly múmkindik beredi. Sý tasqynyna qaramastan, Qazaqstan bıliginiń kóshpeliler oıyndaryn ótkizýden bas tartpaǵany qýantady. Bul Qazaqstanda sportqa zor mán beriletinin aıǵaqtaıdy».
– Biz ózindik kreatıvti stıli bar, áleýeti zor Qazaqstandaǵy sport jýrnalıstıkasyn asqan qyzyǵýshylyqpen baqylap otyrmyz. Qazaqstan delegasııasy AIPS forýmdaryna belsendi qatysyp, onyń barysynda óz bastamalaryn turaqty negizde usynyp keledi, – dep atap ótti Halyqaralyq sport basylymdary qaýymdastyǵy Azııa bólimshesiniń (AIPS ASIA) bas hatshysy Amdjad Malık.
– Forýmǵa qatysýshylar alapat sý tasqynyna baılanysty elimizdiń birqatar mańyzdy halyqaralyq is-sharadan bas tartyp, bıýdjet qarajatyn únemdegenine qaramastan, Qazaqstan áli de Dúnıejúzilik kóshpeliler oıyndaryn ótkizýge daıyn ekenin quptady, – dedi Halyqaralyq sport basylymdary qaýymdastyǵy Azııa bólimshesiniń (AIPS ASIA) atqarýshy komıtetiniń múshesi Ilııas Omarov.
Sondaı-aq AIPS kongresi aıasynda jańa «Sport Plus Qazaqstan» telearnasynyń tusaýkeseri ótti. Sonymen qatar qazaqstandyq delegasııa ókilderi Qaýymdastyqtyń 100 jyldyǵy sheńberinde tájirıbe almasý maqsatynda Qazaqstanda jas tilshiler úshin (AIPS Young reports) halyqaralyq AIPS semınaryn uıymdastyrýǵa daıyn ekenin jetkizdi.
