Budan ári óńir basshysy Alataý qalasynyń tyl ardageri, kópbalaly ana, «Altyn alqa» ıegeri Bulyn Ramazanova men Uzynaǵash aýylyndaǵy soǵys ardageri Fedor Kovalevty arnaıy baryp, quttyqtady. Ardagerlermen kezdesý barysynda olardyń erligin ulyqtap, oblys turǵyndarynyń atynan alǵys aıtty. Sondaı-aq, Memleket basshysy Qasym-Jomart Toqaevtyń quttyqtaý hatyn oqyp, syılyǵyn tabystady.
«Bıylǵy Jeńis kúnin bizben birge nábári 7 maıdanger qarsy alyp otyr. Olar: Ile aýdanynan Táńirbergen Tolǵanbaev, Jambyl aýdanynan Fedor Kovalev, Eńbekshiqazaq aýdanynan Soltanbaı Jaryqbasov, Qonaev qalasynyń turǵyny Oksana Betebaeva, Qarasaı aýdanynan Pavel Polovoı, Uıǵyr aýdanynan Alım Kebırov jáne talǵarlyq Vıacheslav Legostaev syndy apa-atalarymyz búgingi qýanyshty kúnge aman-esen jetti. Qazirgi kúni 2,5 myńnan astam tyl eńbekkeri óskeleń urpaqqa ónege bolyp júr. Olardyń kóshbasynan kórinetin Tastemir Baıǵabylov, Marııa Muqanova, Narıman Saýranbaev, Galına Lıasheva, Kúlpara Shortanova, basqa da tyl ardageleri áli de qoǵamdyq ómirge aralasyp, jastarǵa jol kórsetýde. Ekinshi dúnıejiúzilik soǵystyń ardagerleri men tyl eńbekkerleriniń eshqaısysy memlekettiń qoldaýy men qamqorlyǵynan, qoǵamnyń syı-qurmetinen tys qalmaýda. Bizdiń búgingi basty mindetimiz – aǵa býynnyń surapyl soǵys jyldaryndaǵy óshpes erlikteri men ólsheýsiz eńbekterin barynsha dáripteý. Sebebi «Erlik – elge mura, urpaqqa – úlgi», dedi óńir basshysy Marat Sultanǵazıev.
Jeńis kúni oblys ákiminiń orynbasarlary, aýdandar men qala ákimderi de ardagerlerdi merekemen quttyqtap bardy. Olar maıdangerlerge zor densaýlyq pen otbasyna amandyq, baqyt pen shattyq tiledi.
Aıta keteıik, ekinshi dúnıejúzilik soǵysqa Almaty oblysynan 40 myńdaı adam áskerge attanǵan. Kózsiz batyrlyqtyń jarqyn úlgisin kórsetken 20 maıdangerge Keńes Odaǵynyń Batyry ataǵy berilse, oblystyń 6 týmasy «Dańq» ordeniniń tolyq ıegeri atandy.
