Foto: caspianlife.kz
О́tinim qabyldaýdyń 1-leginde 4500 tulǵaǵa grant berý josparlanyp otyr.
Jańa bıznes-ıdeıalardy iske asyrý grantyna ótinim bere alatyn azamattar:
- tirkelgen jumyssyzdar;
- jeke kásipkerler (tirkeý merzimi 3 jylǵa deıin).
Bul rette úmitker tómendegi áleýmettik sanattardyń birinen bolý kerek:
- múgedektigi bar adamdar;
- qoldanystaǵy «qandas» mártebesi bar adamdar;
- óńiraralyq qonys aýdarýshylar;
- az qamtylǵan otbasy músheleri;
- kópbalaly otbasy múshesi (jubaıy / zaıyby);
- múgedektigi bar balany tárbıelep otyrǵan adam (jubaıy / zaıyby);
- asyraýshysynan aıyrylý boıynsha járdemaqy alýshylar.
Sondaı-aq úmitkerdiń «Bastaý Bıznes» jobasy boıynsha kásipkerlik negizderine oqytý týraly 3 jyldan aspaıtyn merzimge sertıfıkaty bolýy tıis.
«Rásimderdiń ashyqtyǵyn qamtamasyz etý, adamı faktordy azaıtý, ótinish berýshilerge yńǵaıly bolý úshin granttar berýdiń búkil prosesi elektrondyq formatqa aýystyryldy. Grant alýǵa ótinimderdi qabyldaý biryńǵaı tereze – «Business.enbek.kz» portaly arqyly júzege asyrylady.
Grantty: qajetti qural-saımandardy, eńbek quraldaryn, tehnologııalyq jabdyqtardy, maldardy, janýarlardy, qustardy, kóshetterdi, butalardy, tuqymdardy satyp alýǵa, oryn-jaılardy jalǵa alý aqysyn tóleýge alýǵa bolady.
Granttar tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aksızdeletin ónimder óndirýge berilmeıdi», delingen mınıstrlik málimdemesinde.
Úmitkerler óz bıznes-jobasyn komıssııa otyrystarynda tanystyrady. Al komıssııanyń árbir múshesi bıznes-jospardy belgili shart negizinde baǵalaıdy.
Grant berý týraly sheshim komıssııalyq túrde jáne úmitkerlerdiń bıznes-jobalarynyń pysyqtalýyn baǵalaýdyń naqty ólshemsharttary negizinde qabyldanady.
Komıssııa sheshimi úmitkerdiń Portaldaǵy jeke kabınetine jiberiledi. Komıssııanyń oń sheshimi bolǵan jaǵdaıda úmitker bank derektemelerin usynady, shartqa qol qoıady jáne odan ári toqsan saıyn qarajattyń paıdalanylýy týraly esep beredi. Munyń bári Eńbek mobıldiligi ortalyqtary men onyń fılıaldaryna (mansap ortalyqtaryna) barmaı-aq elektrondyq formatta jasalady.
Aıta keteıik, grant qarajaty isin jańa bastaǵan kásipkerlerge ózderiniń bıznes-áleýetin ashýǵa, óndiristi jolǵa qoıýǵa jáne damytýǵa, sol arqyly ózin turaqty tabyspen qamtamasyz etý úshin beriledi.
