Qostanaıda burynǵy Qarjy polısııasynyń qyzmetkerleri jumyssyz qaldy

QOSTANAI. 10 qańtar. Qostanaı oblysynda burynǵy Qarjy polısııasy qyzmetkerleriniń úshten biri qazir jumyssyz qaldy. Bul jóninde egemen.kz tilshisi habarlady. Memlekettik qyzmet isteri jáne sybaılas jemqorlyqqa qarsy is-qımyl agenttigi oblystyq departamenti basshysynyń orynbasary Asqar Shomanovtyń aıtýynsha, buryn Ekonomıkalyq qylmysqa jáne sybaılas jemqorlyqqa qarsy kúres departamentinde 162 qyzmetker, al Memlekettik qyzmet agenttiginiń oblys boıynsha basqarmasynda 15 adam jumys istepti. Qazir departamentte 82 adam qyzmet atqarady. Burynǵy qarjy polıseıleriniń birazy Qarjy mınıstrliginiń bólimshelerine qyzmetke turdy, biraq oblystaǵy burynǵy Qarjy polısııasy qyzmetkerleriniń 30 paıyzy jumyssyz qaldy. Aıta keteıik, Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti burynǵy Ekonomıkalyq qylmysqa jáne sybaılas jemqorlyqqa qarsy kúres agenttigi men Memlekettik qyzmet isteri jónindegi agenttikti biriktirip, qaıta qurý nátıjesinde jańadan qurylǵan bolatyn. Asqar Shomanov málim etkendeı, memlekettik qyzmet isteri jáne sybaılas jemqorlyqqa qarsy is-qımyl departamentinde áli shtat jasaqtalyp jatyr, qyzmetkerlerdiń sany 125-ke jetýi tıis. Qazir bos oryndarǵa konkýrs jarııalandy. Oǵan burynǵy qarjy polıseıleri qatysýyna bolady. Biraq olar qaıtadan memlekettik qyzmetke qabyldanatyn rásimderden ótýi qajet, sonymen qatar deneshynyqtyrý normalaryn tapsyrýy kerek. Taǵy bir aıta keter jaıt, atalmysh departamentte qoǵamda jumysy sybaılas jemqorlyqqa qarsy mádenıetti qalyptastyrý jáne azamattardyń quqyqtyq saýatyn kóterýge baǵyttalǵan jańa eki bólimniń ashylýyna baılanysty laýazymdyq qyzmet orny 15-ten 25-ge deıin kóbeıdi. Olardy konkýrs arqyly emes, taǵaıyndaıdy. Názıra Járimbetova. Derek, sýret: egemen.kz.