Foto: Qazaqstan boks federasııasy
Bas bapker «Elorda kýbogi III» halyqaralyq týrnıri buǵan deıin 6 salmaq dárejesinde Parıj olımpıadasyna qatysý múmkindigin beretin lısenzııany jeńip alǵan boksshylardyń tájirıbesin tolystyryp, sheberligin shyńdaý úshin ýaqytynan buryn uıymdastyrylyp otyrǵanyn aıtty.
«Bıylǵy «Elorda kýbogi III» halyqaralyq týrnıri – Olımpıadaǵa qatysatyn boksshylardyń fızıkalyq, tehnıkalyq daıyndyǵyn sońǵy ret tekserý úshin ýaqytynan erte ótkizilip jatyr. Olımpıadaǵa qatysatyn jigitterge óz paıdasyn tıgizedi dep oılaımyz. Qolynda joldamasy bar jigitterdi bir tekserip alyp, kem-ketikti, tájirıbeni durystaý úshin osy týrnırge bári qatysyp jatyr. Bıylǵy týrnırdiń deńgeıi ortasha deýge bolady. Byltyr budan da kóp memleket qatysqan. Aıdyń sońynda Taılandta olımpıada lısenzııasy sarapqa salynatyn báseke ótedi. Kóp el sol jarysqa basym den qoıyp otyr. Jarysqa О́zbekstan, Úndistan, Iran, Japon, Qyrǵyzstan memleketteriniń myqty boksshylary keldi. Odan bólek Qytaı men Ázerbaıjannan Olımpıadaǵa lısenzııa alǵan boksshylar da baq synap jatyr. Olar da sheberligin shyńdaý maqsatynda keldi Astanaǵa. Bizdiń boksshylar da tek óz elimizdiń boksshylarymen daıyndalyp qoımaı, sheteldiń boks mektebinen ótken qarsylastarmen kúsh synasady. О́zderiniń kem-ketigin kóredi. Bapkerler, biz, osy jarystan keıin jekpe-jekterdi saralap, kimge ne jetispeı turǵanyn anyqtaý úshin jumys isteımiz», dedi Myrzaǵalı Aıtjanov.
Astanada ótip jatqan baıraqty boks básekesinen keıin de olımpıadalyq quram tórtjyldyqtyń basty dodasyna daıyndyqty áste báseńdetpeıdi. Sebebi, alda aýqymdy 2 oqý jattyǵý jıyny josparlanyp otyr. Onyń alǵashqysy shetelde ótse, keıingisi Túrkistan oblysynda uıymdastyrylady.
«Bul týrnırden keıin Túrkııada 10 kúndik tynyqtyrý, onymen qosa jattyǵý jıyny ótedi. Jigitter teńizge túsip qana qoımaı, qumda júgiredi. Ár kúnge belgilengen túrli jattyǵýdy da josparly túrde jasaımyz. Odan keıingi oqý-jattyǵý jıyny taýda Túrkistan oblysyndaǵy «Alma-taý» bazasynda bolady. Jalpy dene daıyndyǵyn pysyqtaımyz. Sol bazada 21 kún eń úlken jumystardy, daıyndyqty atqaramyz. Boksshylarymyzdyń rıngte fýnksıonaldyq ázirligi myqty bolý úshin, sonda aýqymdy jattyǵý jıynyn ótkizemiz. Osy jıynǵa bizben birlese Ázerbaıjan jáne taǵy 2-3 el ótinish bildirip otyr. Barlyǵy durys bolǵan jaǵdaıda birikken oqý-jattyǵý jıynyn ótkizemiz. Ol jerde sheberlik, taktıkalyq ári arnaıy qarsylastarǵa qarsy zertteý jumystaryn júrgizemiz», dedi bas bapker.
Bokstan Italııanyń Býsto-Arsısıo qalasynda ótken lısenzııalyq týrnırde 63,5 kg salmaq dárejesinde Qazaqstan quramasynyń qorjyny bos keldi. Alaıda, komanda tolyq qurammen Parıjge barý úshin sońǵy múmkindik Taılandta synalady. Bul básekede de Muhamedsabyr Bazarbaıuly joldamany jeńip alýǵa kúsh salady. Oǵan ekinshi múmkindik elde ótken sparrıngtik jekpe-jekterde basym bolǵany úshin berilip otyr. Myrzaǵalı Aıtjanov Muhamedsabyr Bazarbaıulynyń jaýapty jarysqa daıyndyǵy qalaı ótip jatqanyn aıtty.
«Buǵan deıin 6 boksshymyz Olımpıada joldamasyn qanjyǵalady. Tek 63,5 kg salmaq dárejesinde joldama buıyrmaǵan edi. Taılandta Muhamedsabyr Bazarbaıuly oǵan qol jetkizedi dep senemiz, úmittenemiz. Muhamedsabyr Bazarbaıuly lısenzııalyq týrnırge daıyndalyp, oqý-jattyǵý jumystaryn jalǵastyryp jatyr. 21 mamyr kúni Taılandqa ushady. Sol jerde bar kúshin salyp, elimizge lısenzııamen oralady degen oıdamyz», dedi Myrzaǵalı Qulanuly.
