Týrnırdiń ashylý saltanatyna batyrdyń ata-anasy men týystary, Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary, Halyq qaharmany general-maıor Qaırat Úmbetov, «Ortalyq» óńirlik qolbasshylyǵynyń qolbasshylyǵy, sondaı-aq Jańaarqa aýdany ákimdiginiń ardagerleri men ókilderi qatysty.
General Qaırat Úmbetov aldymen qaharman sarbazdyń ata-anasymen júzdesti.
«Qatardaǵy jaýynger Aıbat Amanov patrıotızm men Otanǵa degen sheksiz adaldyqtyń jarqyn úlgisi. Memleket basshylyǵy, ásker qolbasshylyǵy qıyn - qystaý sátte memlekettigimizdi qorǵaǵan Otanymyzdyń arda uldaryn joǵary baǵalaıdy. Qos batyrdyń jarqyn beınesi bizdiń júregimizde máńgi saqtalady. Osyndaı ultjandy uldardy tárbıelep ósirgen ata-ana, jaqyndaryna myń alǵys! Tynyshtyq pen tutastyqty saqtaý jolyndaǵy Aıbat pen Madııardyń erligi — óskeleń urpaqqa zor úlgi», dedi Halyq qaharmany general Qaırat Úmbetov.
Sodan keıin, batyr sarbazdyń turǵan úıinde, Aqseleý Seıdimbek orta mektebinde memorıaldyq taqtanyń ashylýy ótti.
Is-sharaǵa arnaıy kelgen Madııar Qaısarovtyń ákesi Orazaly Qaısarov sóz sóılep, Ulttyq ulan basshylyǵy men ákimdik qyzmetkerlerine alǵysyn bildirdi.
«Aıbat Amanov el táýelsizdigin qorǵaǵan batyr. Osyndaı syı-qurmet kórsetilip jatqanyna ata-ana retinde alǵysymdy bildiremin», dedi erjúrek sarbazdyń ákesi.
Mektep ujymy kópshilikti qaharman sarbaz oqyǵan synyppen tanystyrdy. Nátıjesinde mektep pen Ulttyq ulan arasynda ózara yqpaldastyq týraly memorandýmǵa qol qoıyldy. Bolashaqta osy bilim uıasynda «Jas búrkit» áskerı-patrıottyq synyp ashylatyn bolady.
Batyr sarbazdyń erligin eske alýǵa arnalǵan boks birinshiliginde júzdegen jasóspirim baq synaıdy.
Eske salaıyq, 2022 jylǵy qańtarda jappaı tártipsizdikter kezinde Qyzylordada ornalasqan 5547 áskerı bóliminiń qatardaǵy jaýyngeri Madııar Qaısarov, sondaı-aq Taldyqorǵan qalasyndaǵy 5514 áskerı bóliminiń qatardaǵy jaýyngeri Aıbat Amanov qarýlastaryn qutqarý maqsatynda soqqyny ózderine qabyldap, erlikpen qaza tapqan edi.
Kórsetken erligi men batyldyǵy úshin áskerı qyzmetshiler qaıtys bolǵannan keıin Memleket basshysynyń Jarlyǵymen III dárejeli «Aıbyn» ordenimen jáne ásker basshysynyń buıryǵymen «Ulttyq ulan qyzmetiniń úzdigi» tósbelgisimen marapattaldy. Batyr jaýyngerlerdiń esimderi ózderi qyzmet etken áskerı bólim jeke quramynyń tizimine máńgige jazyldy.
