Sýretti túsirgen – Erlan OMAR, «EQ»
Keıde tipti talas týdyryp jatatyndyqtan, buǵan deıin de qalada 180 kósheniń aty joq ekendigin, kerisinshe 51 kósheniń ataýlary qaıtalanatyny, keı kóshelerdiń ataýy memlekettik saıasatqa saı kelmeıtini, oǵash ataýlar týraly másele kóterip, arnaıy maqala jazǵan kezderimiz de boldy. Bul másele qalalyq máslıhat jıyndarynda da talqylanyp jatady.
Endigi jerde Almatyda birneshe kóshege belgili tulǵalardyń esimderin berý josparlanyp jatqan jaıy bar. Sebebi turǵyndardan qala kóshelerine Qazaqstannyń belgili óner qaıratkerleri: ánshi Ermek Serkebaev, kompozıtor Eskendir Hasanǵalıev, akterler Iýrıı Pomeransev pen Vladımır Tolokonnıkovtiń esimin berý týraly ótinishter kelip túsken.
Qalalyq máslıhattyń sheshimimen Bostandyq aýdany Iý.Gagarın dańǵylynyń K.Tımırıazev kóshesinen Ál-Farabı dańǵylyna deıingi bóligine Ermek Serkebaev dańǵyly, Áýezov aýdany Iýbıleınaıa kóshesine Vladımır Tolokonnıkov atyn berý josparlanyp otyr. Eskendir Hasanǵalıevtiń esimi Túrksib aýdanynyń «Jas qanat» shaǵyn aýdanyndaǵy ataýy joq kóshege beriledi, al Iýrıı Pomeransevtiń esimimen qalanyń Bostandyq aýdanyndaǵy ataýy joq kóshe atalady.
ALMATY
