Jarysqa qatysqan Senat Tóraǵasy Máýlen Áshimbaev memlekettiń áleýmettik saıasatyn iske asyrýda jáne erekshe qajettiligi bar adamdardy ońaltý isinde sport mańyzdy ról atqaratynyn atap ótti.
Sondaı-aq Palata Spıkeri Memleket basshysy elimizde ınklıýzıvti qoǵam qurýǵa jáne soǵan qajetti barlyq jaǵdaıdy jasaýǵa basa mán berip kele jatqanyn tilge tıek etti.
«Run for Autism» – jaı sport jarysy emes. Búgingi jarys kásibı sportshylar men áýesqoılardy, eresekter men balalardy biriktirgen mańyzdy bastama. Bul saıysqa eki myńnan astam belsendi azamat, erekshe qajettiligi bar balalar jáne olardyń ata-analary qatysyp jatyr. Prezıdentimiz Qasym-Jomart Kemeluly Toqaev múmkindigi shekteýli azamattardy qoldaýǵa jáne aýyldarymyz ben qalalarymyzda ınklıýzıvti orta qalyptastyrýǵa únemi basa mán berip keledi. Búgin biz osy jarys arqyly elimizdegi ár balaǵa erekshe qajettiligine qaramastan bilim alyp, damýy úshin teń múmkindikter berý jolynda taǵy bir mańyzdy qadam jasap otyrmyz. Barshańyzdy osyndaı ıgi bastamany qoldaýǵa, ár balanyń óz áleýetin júzege asyrýyna jaǵdaı jasalǵan ınklıýzıvti qoǵam qalyptastyrýǵa úles qosýǵa shaqyramyn, - degen Máýlen Áshimbaev jarysty uıymdastyrýshylarǵa alǵys bildirdi.
Aıta keteıik, búginde Qazaqstanda aýtızm dıagnozy qoıylǵan 15 myńnan astam bala bar. Jarysty uıymdastyrǵan «Bolashaq» korporatıvtik qory 2015 jyldan beri aýtızm jáne basqa da mentaldi buzylý dertine shaldyqqan balalardy oqytýǵa arnalǵan baǵdarlamany iske asyryp keledi. Osy maqsatpen Qor elimizdiń 22 qalasynda ınklıýzııany qoldaýǵa arnalǵan 57 kabınet ashty. Sonyń nátıjesinde 800-den astam erekshe bala mektepke baryp, bilim alý múmkindigine ıe boldy.
