Foto: Tajkýranov M.
Báıge-marafonnyń jalpy jol qashyqtyǵy 500 shaqyrymdy quraıdy. Báıge Pavlodarda bastalyp, Aqmola oblysynda jalǵasady. 23 mamyr kúni marafon Astana qalasynda aıaqtalady.
Joryq baǵdarlamasyna sáıkes, komandalar marafon-báıgeniń alǵashqy 100 shaqyrymyn baǵyndyryp, birinshi kezeńniń máresi Ekibastuz mańynda aıaqtaldy.
Alǵashqy kezeń qorytyndysy boıynsha, Shyǵys Qazaqstan oblysynyń komandasy jeńimpaz atandy. Mańǵystaý oblysynyń shabandozdary máre syzyǵyna ekinshi bolyp kesse, Soltústik-Qazaqstan oblysynyń komandasy úshtikti túıindedi.
Alǵashqy kezeńde birden Almaty, Qyzylorda oblystary men Shymkent qalasynan kelgen komandalar jarystan túrli sebeppen shyǵyp qaldy.
«Attardyń shama-sharqyn baǵamdaǵan shabandozdar sáıgúlikterin qınamaı, der kezinde jarysty toqtatqandary jaqsy sheshim boldy», dedi Bas tóreshi Nadejda Kýpsova.
Búgin bastalatyn 2-kezeńdi 16 komanda jalǵastyrady.
100 km qashyqtyqty komandalar myna merzimde júrip ótti:
- ShQO - 5 saǵ. 47 mın.
- Mańǵystaý oblysy - 5 saǵ. 49 mın.
- SQO - 5 saǵ. 51 mın.
- Jambyl oblysy - 5 saǵ. 52 mın.
- Jetisý oblysy - 5 saǵ. 55 mın.
- Almaty qalasy - 6 saǵ. 09 mın.
- Aqmola oblysy - 6 saǵ. 23 mın.
- Pavlodar oblysy - 6 saǵ. 29 mın.
- Qostanaı oblysy - 6 saǵ. 30 mın.
- Astana qalasy - 6 saǵ. 35 mın.
- Abaı oblysy - 6 saǵ. 35 mın.
- Túrkistan oblysy - 6 saǵ. 39 mın.
- Qaraǵandy oblysy - 6 saǵ. 40 mın.
- Ulytaý oblysy - 6 saǵ. 55 mın.
- BQO - 6 saǵ. 57 mın.
- Komanda «Rekord».
Alǵashqy úsh jeńimpaz 5-shi Dúnıejúzilik kóshpendiler oıyndary aldynda 3-7 qyrkúıek aralyǵynda ótetin halyqaralyq marafon-báıgege qatysýǵa lısenzııa alady. Halyqaralyq kezeńge shet memleketterden keminde 15 komanda qatysady dep josparlanyp otyr (Túrkııa, Saýd Arabııasy, Mońǵolııa, Vengrııa, Túrikmenstan, Iran, О́zbekstan jáne t.b.).
Al marafon jumysyna 2 halyqaralyq jáne 3 el sýdıasy, sondaı-aq 2 halyqaralyq jáne 3 jerles mal dárigeri qatysyp jatyr. Olar joǵary standarttardy saqtaý men jylqylardyń densaýlyǵyn baqylaıdy.
Aıta keteıik, ótken eki jyl qatarynan elimizge esimi belgili áýesqoı veloshabandoz Rabbım Borashov attyly shabandozdarmen birge Astanadan Túrkistanǵa deıingi 1200 jáne 1300 shaqyrymdy baǵyndyrǵan edi. Sportshy bul joly da 5 kúndik alamanǵa qatysyp, 500 shaqyrymdy baǵyndyrýdy mejelep otyr.
500 shaqyrymdyq báıge-marafonyn Ulttyq sport qaýymdastyǵy men «AMANAT» partııasy, Pavlodar oblystyq ákimdigi, QR Týrızm jáne sport mınıstrligi birlesip ótkizip jatyr.
