Qoǵamdyq kelisim keńesi áleýmettik, eńbek daýlaryn sheshýge, uıymnyń ujym ishinde jaıly jaǵdaı ornatý qyzmetin úılestirýge, jurtshylyqpen baılanysty jan-jaqty nyǵaıtýǵa yqpal etý maqsatynda qurylyp, mańyzy bar qoǵamdyq-saıası qozǵalystar, qoǵamdyq birlestikter, qaýymdastyqtar, zańdy tulǵalar birlestikteri, úkimettik emes uıymdar, ardagerler men aqsaqaldar keńesteri, kásipodaq, dinı birlestikter ókilderiniń turaqty túrde jumys isteıtin forýmy bolyp tabylady.
Josaly aýyldyq okrýginde osy keńestiń alǵashqy jıyny ótkizilip, onda keńestiń tóraǵalyǵyna men saılandym. Jıynda okrýgtiń 2015-2018 jyldarǵa arnalǵan keshendi damytý jospary tanystyryldy. Sondaı-aq, jıynda okrýgtiń áleýmettik-ekonomıkalyq damýy týraly qujaty, keńes quramy tanystyrylyp, 2014 jyly atqarylǵan jumys qorytyndylandy. Sondaı-aq, jıynda okrýgtiń ózekti máseleleri talqylanyp, elektr baǵandaryn túzeý, gaz tartý jumystary, Tamdy aýyzsý qudyqtaryn dárileý, qoǵamdyq monsha salý, mal baqtashylardy uıymdastyrý, aýylda elektr jaryǵy bolmaǵan kezde halyqqa sý máselesin sheshý úshin qosymsha motor alý, jylqy malyn tańbalaý týraly usynystar engizildi. Okrýgte ótkizilgen jıynda «Týǵan jerge taǵzym» aksııasyn ótkizýdi uıymdastyrý týraly másele qaralyp, onda okrýgtegi aıtýly tulǵa bolǵan Abdolla Jumaǵalıevtiń týǵanyna 100 jyl tolýyna oraı mektep aldyna bıýst ornatý, elimizden shyqqan bedeldi azamattardyń, kásipkerlerdiń tizimi jasaqtalyp, qarjylaı kómek jasaýǵa úndeý jarııalandy. Jalpy, ótkizilgen otyrystarda aýyldyń áleýmettik-ekonomıkalyq, quqyqtyq, qoǵamdyq-saıası damýynyń máseleleri talqylanyp, olardy sheshý boıynsha usynystar aıtylyp, tájirıbelik usynymdar qabyldanyp keledi. Al keńestiń basty maqsaty – áleýmettik-ekonomıkalyq, quqyqtyq, qoǵamdyq-saıası, ultaralyq, tárbıelik, salt-dástúrlik máselelerdi, olar boıynsha qalyptasqan pikirlerdi, kózqarastardy, ustanymdardy maquldaý, qoǵamdyq, ultaralyq túsinistik pen birlikti nasıhattaý. Okrýg turǵyndary Elbasynyń Qazaqstan halqyna arnaǵan Joldaýyn qoldaı otyryp, birlik, túsinistik turǵysynda jumyla eńbek ete bermek.
Asan JÚSIPOV,
Josaly aýyldyq okrýgi qoǵamdyq kelisim keńesiniń tóraǵasy.
Batys Qazaqstan oblysy.
Maqsat aıqyn, baǵyt túzý
Asa qadirli Elbasy Nursultan Ábishuly Nazarbaev! Siz Qazaqstan halqynyń mańdaıyndaǵy jaryq juldyzsyz. Kún nury men aı sáýlesisiz. Siz bilimdiligińiz, aqyldylyǵyńyz, óz halqyńyz ben elińizge degen adal mahabbatyńyz, dana ishki jáne syrtqy saıasatyńyz arqasynda Qazaqstan halqyn baqytqa bastap kelesiz. Sizdiń «Nurly Jol» jobańyz Qazaqstan halqynyń bolashaǵy jarqyn, keleshegi kemel bolatynyna kózimizdi anyq jetkizedi jáne oǵan kámil senemiz. Siz kóp qyrly saıasatyńyzdyń arqasynda dostyq pen birlik týyn joǵary kóterip, halqymyzdy bir judyryqtaı jumyldyryp, eńbek etýge úırettińiz. Sizdiń 1997 jyly birinshi jáne odan keıingi halyqqa joldaǵan Joldaýlaryńyz birligimiz ben yntymaǵymyzdy bekemdeı túsip keledi. Siz bir sózińizde: «Maqsat aıqyn bolmaı, baǵyt túzý bolmaıdy», dep aıtqan bolatynsyz. «Nurly Jol» jobańyz Sizdiń keleshek aıqyn jáne durys ekenin kezekti márte aıǵaqtap berip otyr. Bul baǵytyńyz bizdiń «Máńgilik elimizdiń» dúnıejúziniń damyǵan otyz eliniń qataryna tez arada jetýine jol ashady. Búgin Qazaqstan Eýropa men Azııa arasyndaǵy kópir ispetti. Bereke basy birlikte, birligi bar halyqtyń baıraǵy bıik bolady dep Siz aıtqandaı, bizdiń birligimiz, qudaı qalasa, eshqashan ydyramaıdy. Baıraǵymyzdy urpaǵymyz úshin ylǵı bıikte kóre bereıik. Siz ulaǵatty sózderińizdiń birinde bir adam otymen myń adam jylynady degensiz. Qazaqstandaǵy búgingi ultaralyq tatýlyq pen dinaralyq túsinistik Sizdiń sózińizdiń durystyǵyn aıǵaqtap berip otyr. Sizdiń «Jol kartasy» jobańyzdyń arqasynda men týyp-ósken Panfılov aýdanyndaǵy Penjim aýylynyń qasynda ǵasyrlar boıy qozǵalmaı úıilip qum astynda jatqan dalaǵa eki-úsh jyl ishinde kórkem jáne ásem Nurkent aýyly men Altynkól temirjol beketi salynyp, qanshama adam jumyspen qamtamasyz etildi. Jastar úı alyp, baspanaly boldy. Halyqqa áleýmettik jaǵdaı tolyq jasalǵan. Bul aýdan halqyna óte qundy bereke ákeldi. Aýdanymyzdaǵy bul jańalyq Sizdiń halyqty jylytyp júrgen otyńyzdyń bir jalyny. Bul jalyn Qazaqstan aýmaǵyndaǵy qanshama jerde janǵanyn biz bilemiz. Men – taban aýdarmaı otyz jyl bilim salasynda jumys istegen zeınetkermin. Sizdiń tapsyrmańyzǵa saı balabaqshalar, jańa mektep salynyp, eski mektepti jóndeý úshin bólingen mol qarjy meni qýanyshqa bóledi. Bul – bizdiń balalarymyz, nemere, shóberelerimizdiń jarqyn bolashaǵyna jol ashatyn qadam. Al ózim 78 jasta bolsam da baqyt berse, kárilikten bersin degendeı, ádemi qartaıýǵa Siz arqyly jetkenime rızashylyǵymdy bildiremin. Sizge búkil Qazaqstan analary jáne aýdan halqynyń atynan alǵysymdy aıtamyn. Alda kele jatqan Qazaqstan halqy Assambleıasynyń 20 jyldyǵymen, Uly Otan soǵysyndaǵy Jeńistiń 70 jyldyǵymen quttyqtaımyn. Otbasyńyzǵa amandyq, denińizge saýlyq tileımin. «Nur Otan» shynaıy shattyǵym, Kirshiksiz taza pák kúnim. Eńsesin eldiń kótergen Bedeliń bıik naq búgin, – dep jergilikti aqynymyz jyrlaǵandaı, ózińiz bastaǵan «Nur Otan» partııasynyń bedeli árkez bıikteı bersin!
Maımýnam IMIаROVA, zeınetker,
«Qazaq KSR halyq aǵartý isiniń ozyq qyzmetkeri».
Almaty oblysy, Panfılov aýdany.
Qazaq dese, kóz aldyma Abaı atam keledi
Osylaı tolǵanǵan jas ustaz uly aqynnyń óleńderi men ánderinen árkez zor rýhanı shabyt alatynyn jasyrmaıdy
Qazaq tilinde tamyljyta án salatyn orys qyzy baryn, onyń ǵajaıyp daýysynyń unaıtyny sonshalyq, toı-jıyndarǵa arnaıy shaqyrtyp alynatynyn, al qaısybireýlerdiń onyń ánin tyńdaý úshin ǵana baratynyn estıtinbiz. Birde ánshi qyzdy izdep barǵanymyzda, mamandyǵy boıynsha mektepke qyzmet aýystyrǵanyn bildik. Telefon arqyly habarlasyp, kezdesýge kelgenimizde ózin Valentına Slesarevamyn dep tanystyrǵan minezi ashyq, jaıdary qyz bizdi ejelgi tanysyndaı qushaq jaıa qarsy aldy. Bıyl M. Qozybaev atyndaǵy Soltústik Qazaqstan memlekettik ýnıversıtetin mýzyka mamandyǵy boıynsha bitirip shyqqanyn, qazir shákirtterge sabaq beretinin birden aqtaryp saldy. «Jaqsyda jattyq joq» degen. Kitaphanada suhbatymyzdy odan ári jalǵastyryp, tereńirek tanysýǵa múmkindik aldym. – Týǵan jerim – Aqqaıyń aýdanyndaǵy Lenın aýyly, – dep sabaqtady sózin ol. – Osyndaǵy orys mektebinde oqyp júrgende, qazaq tilin taza meńgerdim. Keıin tildi de, oıdy da ushtaıtyn túrli baıqaýlarǵa qatysa bastadym. Imandaı shynym, Abaı oqýlary erekshe áser etti. Uly shaıyrdyń óleńderin tupnusqadan oqý arqyly ózgeshe bir álemdi, qazaq halqyn basqa qyrynan tanyǵandaı kúı keshtim. Sóz ben oı áýezdiligi janymdy terbep, áldılegendeı boldy. Osylaısha mektep baǵdarlamasymen ǵana shektelip qalmaı, kórkem ádebıetterge degen qumarlyǵym, qushtarlyǵym oıandy. Qazaq dese, Abaı atamyzdyń aldymen kóz aldyma elesteıtini de sondyqtan. Qazaq tilinde án aıtýdy «Kózimniń qarasynan» bastaǵanym beker emes shyǵar, babamyz aıan bergen bolar dep keıde oılaımyn. Búginde repertýarymda júzge tarta qazaq ánderi bar. Valentına ýnıversıtette oqyp júrgende tórt jyl boıy qalanyń betkeustar meıramhanalarynda qazaq ánderin áýelete shyrqap, toılardyń kórkine aınalypty. Grantpen oqyǵan, shákirtaqysyn úzbeı alyp turǵan stýdenttiń bul áýestigi tek aqshaǵa qyzyqqandyqtan emes, rýhanı júrek qalaýynan týsa kerek. Joǵary oqý ornyn úzdik bitirip shyqqan onyń mýzyka pániniń muǵalimi mamandyǵyna qosa, fortepıano men gıtarada táp-táýir oınaıtyn óneri de bar. Sol sııaqty, vokaldyq jáne dırıjerlik mamandyqtarǵa mashyqtanyp, teorııalyq án sabaǵyn da júrgize alady. Biraq kásipqoı ánshi bolýdy maqsat tutqan emes. Qazir qaladaǵy №4 orta mektepte 1-6-synyptarǵa mýzyka páninen sabaq beredi. Shaǵyn ortalyqta mýzykalyq úıirmege jetekshilik jasaıdy. Ol «Segiz aıaq» pen «Aıttym sálem, qalamqasty» tamyljyta oryndaǵanda aldyna túsetin ánshi joq pa dep qalasyń. Keń tynysty joǵary soprano daýysymen «Kózimniń qarasynyń» birer shýmaǵyn tógiltkende jan tebirenip, senbeske laj qalmady. Onyń «Nurlan men Murat» tobymen óner kórsetý sáti de túsipti. Sahna tórinde «Sarjaılaý», «Otyrardaǵy toı», «Qoshtasqym kelmeıdi» ánderin shyrqap, ataqty dýettiń ózin tańǵaldyrypty. Jergilikti «Sherter» qazaq ansamblimen birlesip konsert bergen kezderin jylylyqpen eske alady. Sol joly Abaıdyń «Jelsiz túnde jaryq aı» ánin úırenip alypty. – Nege ekenin bilmeımin, maǵan qazaq ánderi qatty unaıdy. Sirá, ol Abaıdyń óleńderi men ánderine degen zor súıispenshilikten oıanǵan bolar. Jáne de meniń soprano daýysyma qatty úılesedi. Jerlesimiz Sábıt Muqanovtyń sózine jazylǵan «Qazaq valsin» oryndaǵanda da janym tańǵy shyqtaı tazaryp shyǵa keletindeı kórinedi. «Birjan-Sara» operasynan Saranyń arııasyn súıip oryndaımyn. Al jastardyń toıynda kóbinese qazaqtyń estradalyq ánderin oryndap júrmin. Aldaǵy maqsatym – shákirtterimniń boıyna qazaq ánderiniń nárin sińirý, – deıdi aǵynan jarylǵan keıipkerimiz. Onyń ánge degen áýestigi ákesi Sergeı Alekseevıchten juqsa kerek. Aýyldyń qarapaıym eńbekkeri jas kezinde sharýashylyqta qurylǵan estradalyq ujymǵa múshe bolyp, jetpisinshi jyldary «Toı jyry» ánin aıtqany qyzynyń esinde qalypty. Valentınanyń ustazdyq aıaq alysy da qýantady. Mektep janyndaǵy shaǵyn ortalyqtaǵy tórt toptyń balalaryna Memlekettik gımndi úıretipti. «Altyn kúz» ánimen mektep sahnasyna shyǵarypty. Muǵalimder merekesinde oqýshylary «Mektebim» ánin oryndap, úlken syılyq jasapty. Abaı ánderimen qanattanǵan arý qazaq ánderin jas órenderge úıretýdi osylaısha sátti jalǵastyryp keledi.
Toqtar NURAHMETULY, jýrnalıst.
Soltústik Qazaqstan oblysy.
Sýretti túsirgen Amangeldi BEKMURATOV.
Páter alǵan kúni Elbasyna hat jazamyn
– deıdi oblys ortalyǵyndaǵy №19 qazaq orta mektebiniń 7-synyp oqýshysy Nurjan Múgilsim
«Egemenniń» oblys ortalyǵyndaǵy tilshiler qosynyna adamdar aryz-shaǵymdaryn alyp kelip-ketip jatady. Olarǵa qoldan kelgenshe kómektesýge asyǵamyz. Janaıqaılaryn gazet betine jazyp ta júrmiz. Myna bir hatqa mán berip qarar bolsaq, oı salarlyqtaı eken. Ramazan men Qaýııa úı kezegine sonaý 1992 jyldary tursa kerek. Sonaý dep aıtýǵa týra keledi, óıtkeni, sonshama jyldar boıy páter alamyz degen úmitterin úzbeı áli kútip júr. Sol jyldary turǵyn úı kezekteriniń qujattary oblys ortalyǵyndaǵy Indýstrııalyq aýdany taraǵan kezde joǵalyp ta ketipti. Keıinnen Múgilsimder otbasy 2003 jyly taǵy da áleýmettik turǵyn úı kezegine turǵan. Onyń ózine 11 jyldaı ýaqyt ótipti. Páterden páterge kóship júrse de, Ramazan men Qaýııa Merýert, Qarlyǵash atty eki qyz ben Baýyrjan, Narıman, Nurjan degen úsh uldy tárbıelep ósirgen. Qazir Merýert turmys qurypty, 3 balasy bar, Qarlyǵash ta turmysta, 3 balaly, ekeýi de muǵalim. Bir ókinishtisi, Baýyrjan aýyryp múgedek bolyp qalǵan soń, úıde oqıdy. Narıman ásker qataryna baryp kelgen. Arnaıy orta bilimdi, oblys ortalyǵyndaǵy №1jylý elektr stansasynda jumys jasaıtyn ákesiniń jolyn qýyp, gazben, elektrmen dánekerleýshi mamandyǵyn alǵan. Sóıtip, Ramazan men Qaýııa nemereli de boldy, uldary Narıman úılenip, ómirge Ermahan atty ul keledi. Al endi bizdiń keıipkerimiz Nurjannyń jaıyna toqtalaıyq. Ol – Ramazannyń úshinshi uly. 2007 jyly Elbasy jumys saparymen Pavlodarǵa kelgende oblys ortalyǵyndaǵy №10 balabaqshaǵa da soǵady. Sol kezde Nurjan Múgilsim Elbasyna kompıýter arqyly qazaqy uǵymdar tizbesin jasap kórsetip bergen edi. – Kishkentaı kúninde Elbasymen túsken sýretke jıi qaraı beretin.Úıge kelgen qonaqtarǵa, dostaryna kórsetip jatatyn. Áli de ústeliniń ústinde turady. Ǵumyr boıǵy estelik qoı, – deıdi Ramazan bizben áńgimesinde. Qazir sol kishkentaı kompıýtershi bala Nurjan erjetken. Oblys ortalyǵyndaǵy №19 mekteptiń 7-shi synybynda oqyp júr. Elbasynyń rızalyǵyn, batasyn alǵan bala. Talapty. Zerek oqýshy. Qazir osy Nurjan ósip kele jatqan otbasy oblys ortalyǵyndaǵy páter kezeginde 71-shi bolyp tur eken. Áne-mine deýmen, kútýmen, sheneýnikterdiń ýádesine senýmen keledi. Ylǵı keıin shegerile bergen ǵoı. – Áke-sheshemniń talaı jyldar boıy sarylyp ázer jetken 71-shi kezegin taǵy da keıin shegerip tastamasa eken, bıyl páter alsaq, qýanyshymdy aıtyp Elbasyna hat jazar edim, – deıdi Nurjan. Olaı bolsa, bizdiń de Elbasymen túsken sýretke qarap jylylyq, meıirimdilik izdeıtin Nurjannyń, besikte jatqan kishkentaı Ermahannyń qýanyshyna ortaqtasqymyz keledi, endi, jergilikti ákimdikter de nazarǵa alyp, oılanar dep kúteıik.
Farıda BYQAI,
«Egemen Qazaqstan».
PAVLODAR.
