Malaızııa premer-mınıstri Ánýar Ibragım 16 mamyrda Prezıdent saraıynda (Aqorda) Qazaqstan Prezıdenti Qasym-Jomart Toqaevpen kezdesti. Premer-mınıstr delegasııalardyń ekijaqty kezdesýi barysynda birqatar kelisimge qol jetkizilgenin málim etti, eki el arasyndaǵy saýda, ınvestısııa, joǵary bilim, týrızm jáne halal ındýstrııasy sııaqty ártúrli saladaǵy yntymaqtastyqtyń keńirek talqylanǵanyn atap ótti.
Ánýar Ibragım Astanaǵa sapary týraly X jelisindegi akkaýntynda da jazdy. «Resmı qabyldaýdan keıin Prezıdent Toqaev ekeýimiz Malaızııa men Qazaqstan arasyndaǵy qarym-qatynasqa qatysty mańyzdy máselelerdi talqylap, tórt tarmaqtan turatyn kezdesý ótkizdik, onyń barysynda ózara qyzyǵýshylyq týdyratyn halyqaralyq máseleler de sóz boldy», dedi ol X áleýmettik jelisinde.
Ekonomıkany yryqtandyrý sharalary
Qazaqstan Prezıdenti Qasym-Jomart Toqaev básekelestikti damytý, memlekettiń ekonomıkadaǵy úlesin azaıtý jáne bıznes shyǵyndaryn qysqartý arqyly kásipkerliktiń erkindigin qamtamasyz etýge baǵyttalǵan ekonomıkany yryqtandyrý sharalary týraly jarlyqqa qol qoıdy.
Jarlyqtyń basty erekshelikterine nazar aýdara kelip, bes tarmaqty atap ótýge bolady. Onyń ishinde Básekelestikti qorǵaý jáne damytý agenttiginiń janynan Ulttyq jekeshelendirý ofısin qurý jospary, «Samuryq-Qazyna» Ulttyq ál-aýqat qory men onyń enshiles uıymdaryn korporatıvtik basqarý derbestigin, sapasyn jáne táýelsizdigin arttyrý, sondaı-aq olardyń satyp alý rásimderin jetildirý boıynsha sharalar qabyldanyp jatqany qýantady.
Sondaı-aq Jarlyq aıasynda ónim naryǵynda básekelestikti damytýǵa birqatar naqty shara qarastyrylyp, retteý saıasatyn jetildirý jáne bıznes ashý, júrgizý rásimderin yryqtandyrý sharalary usynylady.
Jarlyq kásipkerlik sýbektileriniń quqyǵy men zańdy múddelerin qorǵaýdy kúsheıtýge baǵyttalǵan sharalar keshenin qamtıdy. Ony júzege asyrý ekonomıkadaǵy memlekettik sektordyń úlesin aıtarlyqtaı qysqartýǵa jáne jedeldetýge, sondaı-aq jeke kásipkerlikke kóbirek múmkindikter ashýǵa septigin tıgizedi.
Tikeleı ınvestısııanyń rekordtyq kórsetkishi
Prezıdent Qasym-Jomart Toqaev Germanııanyń kompanııalary Qazaqstandaǵy úlesin keńeıtýge múddeli ekenin aıtty. Onyń málimdeýinshe, Germanııanyń Qazaqstanǵa salǵan tikeleı ınvestısııasy 712 mıllıon eýrony qurady.
Qazaqstannyń Germanııa Federatıvtik Respýblıkasyndaǵy elshiliginiń habarlaýynsha, Germanııanyń Qazaqstanǵa salǵan tikeleı ınvestısııasy 2023 jyly rekordtyq deńgeıge – 712 mıllıon eýroǵa jetti. Bul derekti Qazaqstan Prezıdenti Q.Toqaev 15 mamyrda ótken Germanııa ekonomıkasy Shyǵys komıtetiniń delegasııasymen kezdesýi kezinde keltirdi. «Bul kórsetkish 2022 jylmen salystyrǵanda 64 paıyzǵa ósti», dedi Q.Toqaev.
Taýar aınalymy artyp keledi
2023 jyly Qazaqstannyń Ortalyq Azııa elderimen taýar aınalymy 7,7 mlrd dollarǵa jetti.
Mundaı derekti saýda jáne ıntegrasııa vıse-mınıstri Qaırat Tórebaev 14 mamyrda Almatyda ótken HIII Ortalyq Azııa saýda forýmynda keltirdi. Q.Tórebaev Ortalyq Azııadaǵy saýda baılanystaryn nyǵaıtýdyń ekonomıkalyq paıdasyn, sondaı-aq aımaqtaǵy ekonomıkalyq ósimge, jumys oryndaryn ashýǵa, ómir súrý deńgeıin jaqsartýǵa qosqan úlesin atap ótti.
Forýmda Qazaqstannyń 131 elmen syrtqy saýda aınalymy 2023 jyly aldyńǵy jylmen salystyrǵanda 3,2%-ǵa ósip, 139,8 mlrd dollarǵa jetkeni atap ótildi. Bul saýda rásimderin jeńildetý, syrtqy ekonomıkalyq belsendilikti yntalandyrý esebinen bolyp otyr.
