Sýretterdi túsirgen – Erlan OMAR, «EQ»
Saltanatty is-sharaǵa Parlament Senatynyń depýtaty Nurtóre Júsip, memleket jáne qoǵam qaıratkeri Saýytbek Abdrahmanov, «Egemen Qazaqstan» gazetiniń ujymy, ardager jýrnalıster, Erjuman Smaıyldyń otbasy, týǵan-týystary qatysty.
Eskertkish-taqtanyń ashylý saltanatynda Saýytbek Abdrahmanov sóz sóılep, zamandas áriptesi týraly esteligin jetkizdi.
– Erjuman aǵamyz «gazetchık» uǵymyn joǵary bıikke kótergen adam. Sol arqyly mamandyqtyń mártebesin asyrdy. Ol prozaǵa da barǵan joq, basqa janrlarǵa da qyzyqqan joq, tipti Erekeńniń alǵashqy kitaby jasy elýden asqanda jaryq kórdi. Sonda da Eraǵa erekshe qurmettiń ıesi boldy. Uıymdastyrýshylyq talantymen, ózgege bolsyn degen jomart júregimen, basqalardyń oıyn ushtaýymen, jastarǵa degen qamqorlyǵymen kózge tústi. Bar ómirin jýrnalıstıkaǵa, gazettiń qara jumysyna arnaýmen ótti. Sóıte júrip, BAQ salasyndaǵy Prezıdent syılyǵynyń tuńǵysh laýreaty atandy. Qyzmettiń bıikterine de kóterildi. Bizdiń mamandyǵymyzdyń mártebesin kótergen, jýrnalıstiń renomesin arttyrǵan adam retinde Erjuman О́teshuly biz úshin erekshe tulǵa, – dedi S.Abdrahmanov.
Al jampoz jýrnalıst Jarylqap Beısenbaıuly jastar gazeti «Lenınshil jasqa» qatar kelgenderin, Erjuman Smaıyldyń kele sala óziniń uıymdastyrýshylyq qabiletimen, iskerligimen erekshelengenin jetkizdi.
– «Lenınshil jastaǵy» myqty aýdarmashylar baspa salasyna aýysyp ketken kez edi. Erjuman kele salyp birden aýdarma isine kiristi. Tipti mátindi birden «dıktovka» jasaı otyryp, aýdaryp tastaıtyn. Sharshamaıtyn, talmaıtyn Erjuman «Egemende» de qara jumysty atqarýshy edi. Túnimen kezekshilikte bolsa da tańerteń jumysta otyratyn. Biz soǵan tańǵalatynbyz, – dedi J.Beısenbaıuly.
Senat depýtaty Nurtóre Júsip Erjuman Smaıyldyń óte saýatty redaktor bolǵanyna toqtaldy.
– Erekeńdi qazaqtyń sózin, búkil maqal-máteli men frazeologııalyq tirkesterdiń barlyǵynyń qalaı saqtalýyn gazet arqyly qalyń qazaqqa jetkizip otyrǵan til zergeri dep aıtýǵa bolady. Adamdyq qyryna keletin bolsaq, bir sózben aıtqanda, Erjuman aǵa «Egemen Qazaqstan» deıtin qadirli de qasterli qarashańyraqtyń quty boldy. Basshymyn dep ámir berip otyrmaı, búkil tirlikti uıymdastyrý, uıystyrý isiniń basy-qasynda júretin. Barlyq tilshiniń, ózge de qyzmetkerlerdiń, «egemendik» burynǵy ardager aǵa-apalarymyzdan bastap, qyzmetkerlerdiń qaı-qaısynyń bolsyn kóńil qybyn tap basyp, aıtpaı tabatyn. Qatal adam sııaqty kóringenimen óte meıirimdi edi. Ol kisiniń meıirimdiligin balalary, nemerelerin qalaı jaqsy kórgeninen bilemiz. Kóp jaǵdaıda syryn syrtqa asha bermeıtin syrbaz minezdi adam edi, – degen N.Júsip Eraǵańnyń basshy men tilshini qatar qabyldaıtyn qarapaıymdylyǵyn aıryqsha atap ótti.
«Egemen Qazaqstan» gazetiniń bas redaktory Ǵabıt Iskenderuly Erjuman Smaıyldyń minezdi adam bolǵanyn, sol mineziniń arqasynda elge qadirli bolǵanyn aıtty.
– Sherhan Murtazanyń 60 jyldyq mereıtoıynda qazaq jýrnalıstıkasynyń korıfeıi Kamal Smaıylov «Basylym bastyǵyna tartady» dep jazǵan edi. Sol sııaqty «Egemen Qazaqstan» basylymy Eraǵa basqarǵan jyldary minezdiligimen halqyna jaqty, jaqyn boldy. Eger Eraǵada minez bolmasa gazettiń bolmysy da basqasha bolar ma edi. Sondyqtan osyndaı minezdi aǵamyzǵa, elge, qazaq jýrnalıstıkasyna eńbegi sińgen Eraǵaǵa osyndaı qurmet kórsetýdi zańdylyq dep sanaımyn, – dedi Ǵ.Iskenderuly.
Eskertkish-taqtanyń ashylý is-sharasynan keıin E.Smaıyldyń qyzy Aıjan Smaıylovany sózge tarttyq.
– Anam ekeýi osy úıde ómirden ótkenshe turdy. Ákem redaksııany Almatydan Astanaǵa bastap kelip edi. О́z salasy boıynsha qandaı bilikti maman bolǵanyn áriptesterinen asyryp aıta almaspyz. Biraq áke retinde eń meıirimdi adam bolǵanyn aıryqsha atap óter edim. Úıde eki aǵaıyndy bolǵandyqtan aǵam ekeýmizdi esh bólip-jarmaı teń qarady, birdeı meıirimin tókti. Gazettiń qym-qýyt, qarbalasqa toly jumysynan keıin mindetti túrde balalaryna da kóńil bólip, bizdiń tárbıemizdi qaperinen shyǵarmady. Degenmen biz ákemizdiń jolyn qýa almadyq. Birimiz dáriger, birimiz zańger boldyq. Eń bastysy, ákemizdiń eshkimniń ala jibin attamaı, eshkimniń nazyna, kóz jasyna qalmaı, memleketke de, halyqqa da adal qyzmet etýdi únemi aıtyp otyratyn ósıetin umytqan joqpyz, – deıdi A.Smaıylova.
Eskertkish taqtany ashý rásimin senator Nurtóre Júsip pen qoǵam qaıratkeri Saýytbek Abdrahmanov atqardy. Jınalǵan kópshilik qara mármarǵa qashalǵan Erjuman О́teshulynyń beınesi sátti shyqqanyna rıza bolysty. Odan keıin arnaıy ótkizilgen ımanı sharada marqum E.Smaıyl men onyń byltyr dúnıe salǵan jubaıynyń rýhyna quran baǵyshtaldy.
