– Qazirgi zaman talabyna saı mýzeı qoǵam sanasyn jańǵyrtýǵa zor yqpal etetin ozyq ınstıtýtqa aınalýy kerek. Sol arqyly jas urpaq tól tarıhymyz ben salt-dástúrimizdi tereń tanyp, odan taǵylym alýy qajet. Jalpy, elimizde tarıhı-mádenı murany saqtaý jáne molaıtý maqsatynda aýqymdy ári úzdiksiz jumys júrgizilip keledi. Uzaq jyldan beri alǵash ret jaqynda materıaldyq emes mádenı muranyń Ulttyq tizbesi aıtarlyqtaı keńeıdi. IýNESKO-nyń materıaldyq emes mádenı muralar tizimine bizdiń «salbýryn» jáne «betashar» sııaqty ulttyq dástúrlerimizdi engizý máselesi pysyqtalyp jatyr, – dedi Qasym-Jomart Toqaev.
Memleket basshysy mádenıet pen óner adamdary tarıhı úrdistiń aldyńǵy shebinde júrip, sol arqyly ultymyzdyń qarqyndy damýyna yqpal etetinin atap ótti.
– Sizder óz shyǵarmashylyqtaryńyz arqyly halqymyzdyń biregeı bolmysynyń jańa qyryn ashasyzdar. Azamattardyń jasampaz qýatyn oıatasyzdar. Sondyqtan memleket shyǵarmashylyq ókilderiniń bedelin arttyrý úshin tıisti sharalardy qabyldaıdy. Mádenıet jáne arhıv isi qyzmetkerleriniń jalaqysy aıtarlyqtaı kóbeıdi. Meniń tapsyrmammen «Halyq ártisi» jáne «Halyq jazýshysy» ataǵy qaıta berile bastady, – dedi Prezıdent.
Qasym-Jomart Toqaev halqymyz daryndy ul-qyzdaryn qashanda qadirleı bilgenine nazar aýdaryp, Astanadaǵy Qazaq ulttyq óner ýnıversıtetine Kúlásh Baıseıitovanyń esimin berý týraly sheshim qabyldaǵanyn jetkizdi.
– Bul – áıgili ánshige kórsetilgen zor qurmet ári erekshe ónerimen tarıhta qalǵan tulǵalarǵa el yqylasynyń aıryqsha belgisi. Túptep kelgende, muny tarıhı ádildikti qalpyna keltirý dep túsingen jón. Aǵa býynnyń ónerdegi jolyn qazirgi jastarymyz da laıyqty jalǵastyryp keledi. Osy sabaqtastyqty saqtaý óte mańyzdy, – dedi Qasym-Jomart Toqaev.
Prezıdent halqymyz daryndy ul-qyzdaryn qashanda qadirleı bilgenine nazar aýdaryp, Astanadaǵy Qazaq ulttyq óner ýnıversıtetine Kúlásh Baıseıitovanyń esimin berý týraly sheshim qabyldaǵanyn jetkizdi.
Aıta keteıik, Kúlásh Jasynqyzy Baıseıitova 1912 jyly 2 mamyrda Qaraǵandy oblysynyń Aqtoǵaı aýdanynda dúnıege kelgen. Qazaq opera óneriniń negizin salýshylardyń biri, qoǵam qaıratkeri. KSRO Halyq ártisi (1936). KSRO Memlekettik syılyǵynyń laýreaty.
Qazaq halqy Kúlásh arqyly dúnıe júziniń klassıkalyq operasy men kóptegen halyqtardyń mýzykasyn tanydy. Onyń daýysy – álemdik operada sırek kezdesetin sulý da syrly daýys bolatyn. KSRO halyq ártisi atanǵanda ánshi nebári 24 jasta ǵana eken.
1933 jyly Kúlásh Baıseıitova Mýzykalyq teatr trýppasynyń (qazirgi Abaı atyndaǵy memlekettikakademııalyq opera jáne balet teatry) quramyna kirip, onymen óziniń búkil ǵumyryn baılanystyrdy. Kúlásh somdaǵan Qyz Jibek, Qadısha, Aqjúnis, Ajar, Cara beıneleri áli kúnge deıin halyq jadynda saqtalǵan. Ol arqyly qazaq halqy alǵash ret klassıkalyq opera qaharmandarymen tanysty.
