Aral teńiziniń tabanynan qazylatyn tuzdyń dámi kóp memlekettiń as mázirinde júr. Al Qyzylorda qalasynda ornalasqan «Altyn Orda» JShS – ıodtalǵan as tuzyn óndirýde kóshbasshy kompanııalardyń biri. Atalǵan seriktestik 1997 jyldan beri jumys isteıdi.
Buǵan deıin kóptegen bıznes jobany iske asyryp kelgen seriktestik 2016 jyldan bastap barlyq talap pen sapa standarttaryna sáıkes «Assol» jáne «Safııa» brendterimen as tuzyn óndiredi. Kásiporynda eki zaýyt bar. Alǵashqysy 2016 jyly iske qosylyp, saǵatyna 3 tonna tuz shyǵara bastady. Al osydan eki jyl buryn saǵatyna 10 tonna ónim shyǵaratyn zamanaýı seh ornatylyp, ekinshi zaýyt jumysyn bastady.
«Bastapqyda ónim kólemi az boldy. Biraq, eń bastysy, sapaǵa ǵana jumys istedik. Bul úrdis áli de joǵalǵan joq. Qansha myń tonna as tuzyn shyǵarsaq ta, aldymen tutynýshylardyń qaýipsizdigi men densaýlyǵyna kepildik beremiz. Iаǵnı shıkizat pen ózge materıaldardy 100 paıyz qadaǵalap otyramyz. Sonyń arqasynda 2021 jyly kompanııa Prezıdenttiń ónimder men qyzmetter sapasy salasyndaǵy «Altyn sapa» syılyǵynyń jeńimpazy boldy. Al byltyr jyl sońynda respýblıkadaǵy «Uly Dala Eli» biryńǵaı brendin paıdalaný quqyǵyn berýge arnalǵan konkýrstyń jeńimpazy atandyq», deıdi kásiporyn dırektory Narıman Abjanov.
Onyń aıtýynsha, byltyr Memleket basshysy Qasym-Jomart Toqaev Syr eline jumys sapary kezinde zaýytta bolyp, kásiporynnyń áleýetine joǵary baǵa beripti.
Kompanııada 150-den astam adam jumys isteıdi. Seriktestiktiń maqsaty da sol, jergilikti turǵyndardy jumyspen qamtýǵa basymdyq bergen. Ortasha aılyq 170 myń teńge kóleminde. Sondaı-aq kásiporyn óńirdegi kóptegen qaıyrymdylyq sharasynda da belsendi. Seriktes kompanııalarmen birigip, ólkeniń órkendeýine, damýyna óz úlesin qosyp keledi.
«Kásiporyn ishki naryqta, ıaǵnı barlyq óńirdi qamtyp otyr. Sondaı-aq ónim syrt memleketterge de tasymaldanady. Bul – óńirdiń áleýmettik-ekonomıkalyq jaǵdaıyna oń áser etip jatyr. Qazir bizdegi «Assol» jáne «Safııa» saýda belgisimen daıyndalatyn as tuzy Reseı, Belarýs, Grýzııa, Qyrǵyzstan, Mońǵolııa memleketterine jáne Baltyq elderine jiberiledi. Eksporttalatyn memleket qataryna taǵy bir el qosyldy. Ol – Qytaı Halyq Respýblıkasy. Mamyr aıynyń basynda ónimdi birinshi ret sonda jiberdik. Aıta ketý kerek, Qytaı eli eń birinshi ónim sapasyna, onyń tabıǵılyǵyna asa qatty nazar aýdarady. Osyndaı talaptardan ótken bizdiń ónimdi aldaǵy ýaqytta taǵy da kóptegen elge jiberý týraly josparymyz bar», deıdi kásiporyn basshysy.
Kompanııa as tuzynan bólek, tehnıkalyq tuz da óndiredi. Tapsyrys aıasynda jylyna 60 myń tonnaǵa deıin daıyndaıdy. Bul ónim Qazaqstannan bólek kóbine-kóp Reseıge jóneltiledi. Qysy qatty, qar kóp jaýatyn eldiń jol tazalaý jumystaryna paıdalanylyp, kóktaıǵaqtyń aldyn alsa kerek. Sondaı-aq ártúrli óndiris orny men munaı kompanııasynan da tapsyrys jıi túsip tur.
Aıta keteıik, atalǵan kásiporynnyń naǵyz shıkizaty óńirden qazylyp alynady. Oblys aýmaǵy men Ulytaý oblysy shekarasyna jaqyn, Qyzylorda qalasynan 180 shaqyrym jerdegi «Arys» ken ornynan zaýytqa arnaıy tehnıkamen tasylady.
Aldaǵy josparlarymen bólisken Narıman Abjanov endigi maqsat – úshinshi tuz óndirý zaýytyn iske qosý ekenin aıtyp otyr. Osy arqyly as tuzyn óndirý mejesin jylyna 100 myń tonnaǵa deıin jetkizbek. Oǵan kásiporynnyń ishki múmkindigi de jetkilikti eken.
