Is-sharaǵa «Tayelsiz Qazaqstannyn Halyq Batyrlary» RQB basshysy, Halyq qaharmany, general-leıtenant Baqytjan Ertaev, «Qarýly kúshter ardagerleri» RQB tóraǵasynyń orynbasary, general-maıor Marat Naǵumanov, Qorǵanys mınıstrligi Áskerı bilim jáne ǵylym departamenti basshysynyń orynbasary, polkovnık Amangeldi Toǵysov, Ulttyq qorǵanys ýnıversıteti, L.N.Gýmılev atyndaǵy Eýrazııa ulttyq ýnıversıteti, M.Jumabaev atyndaǵy Halyqaralyq kolledjdiń oqytýshylary, áskerı oqý ornynyń kadetteri men ulandary qatysty.
Is-shara áskerı kolledj aýmaǵynda ornalasqan Saǵadat Nurmaǵambetovtiń bıýstine gúl shoqtaryn qoıýdan bastaldy. Saltanatty rásimge qatysýshylar batyrdy bir mınýt únsiz turyp, eske aldy.
Qarýly kúshterdiń Memlekettik áskerı-tarıhı mýzeıiniń qoldaýymen kolledjde batyrdyń ómirbaıanynyń kezeńderin beıneleıtin fotokórme, áıgili generalǵa arnalǵan murajaı ekspozısııasy ashyldy. Onda general formasy, kıteli, Ekinshi dúnıejúzilik soǵysta paıdalanǵan komandırlik sómkesi men kartasy, Saǵadat Nurmaǵambetovtiń beınesi toqylǵan kilem ilingen.
Jıynǵa qatysýshylarǵa arnap Qarýly kúshterdiń ardagerleri Baqytjan Ertaev pen Marat Naǵumanov quttyqtaý sóz sóıledi. Konferensııada Ulttyq qorǵanys ýnıversıtetiniń aǵa oqytýshysy, polkovnık Asqar Makıpov, L.N.Gýmılev atyndaǵy Eýrazııa ulttyq ýnıversıtetiniń áskerı kafedrasynyń oqytýshysy, polkovnık Atyǵaı Balǵabekov, M.Jumabaev atyndaǵy Halyqaralyq kolledjiniń oqytýshylary, podpolkovnık Erlan Serikbaev pen kapıtan Serik Súleımenov baıandama jasady.
Jıyn barysynda sóz sóılegender Saǵadat Nurmaǵambetovtiń ómiri men jaýyngerlik jolynyń jastardy áskerı-patrıottyq tárbıeleý isindegi mańyzyn atap ótti. Qazaqstannyń tuńǵysh Qorǵanys mınıstriniń esimimen atalatyn áskerı kolledj tárbıelenýshileri Saǵadat Qojahmetulynyń ómirbaıanyn jaqsy biletinin aıta ketken jón. Batyrdyń qurmetine oqý ornynyń hory «Saǵadat» ánin, Otan qorǵaýshylarǵa arnap basqa da shyǵarmalar oryndady. Al jas ulan Ámzehan Sátjan Halyq qaharmany Saǵadat Nurmaǵambetov týraly shyǵarǵan óleńin oqyp berdi.
