foto: alau.kz
«Almaty-Qostanaı» poıyzy búgin tańerteń saǵat 10:30-da sońǵy núktesine jetti. Perronda tótenshe jaǵdaılar qyzmeti, jedel járdem qyzmetkerleri, polısııa qyzmetkerleri jáne juqpaly aýrýlar mamandary kútip turdy.
«Mundaı oqý-jattyǵýlardyń maqsaty – barlyq temirjol qyzmetteriniń fýnksıonaldyq mindetterin, atap aıtqanda, habarlamalardy taratýshy dıspetcherlik qyzmetterdiń jáne tótenshe jaǵdaılar kezinde azamattyq qorǵanys shtabtarynyń fýnksıonaldyq mindetterin oryndaý. Sondaı-aq oblys pen qalanyń medısınalyq uıymdarymen jáne basqa da uıymdarymen ózara baılanysta bolý kerek», deıdi Qostanaı qalalyq kóliktegi vedomstvolyq sanıtarlyq-epıdemıologııalyq baqylaý basqarmasynyń bas mamany Jibek Iýsýpova.
Dárigerler men jolserikter 1986 jyly týǵan naýqastyń bir kún buryn Jambyl oblysy Sarysý aýdanyndaǵy týystaryna barǵanyn anyqtady. Dárigerler qaýipti aýrýdy juqtyrǵan adamdy da, onymen baılanysta bolǵan joldastaryn da tekserdi. Nusqaýlarǵa sáıkes jolserik aýrý juqtyrǵan jolaýshyny múmkindiginshe basqalardan oqshaýlaýy kerek.
«Bizdiń mindetterimizge aldymen osy vagondy qorshaý, ınfeksııanyń odan ári órshýine jol bermeý úshin basqa jolaýshylardyń kirýine jol bermeý kiredi. Bul jaǵdaıda biz vagondardy jaýyp tastaımyz, ıaǵnı temirjol kóligindegi jolaýshylardyń qaýipsizdigi tolyq qamtamasyz etilgen», dedi Qostanaı stansasy ákimshilik polısııa basqarmasynyń bastyǵynyń mindetin atqarýshy Áset Jaqypov.
Erejege sáıkes, ınfeksııa juqtyrǵan adammen baılanysta bolǵan barlyq jolaýshylar medısınalyq mekemede egjeı-tegjeıli tekserilýge tıis. Barlyq adamdar vagonnan shyqqan soń arnaıy top zalalsyzdandyrý jumystaryn júrgizedi. Tósek-oryn tolyǵymen alynyp, muqııat óńdeledi. Mamandar Qazaqstanda oba aýrýy sońǵy ret 2003 jyly tirkelgenin aıtady. Al bıyl elimizde tyrysqaq aýrýynyń úsh jaǵdaıy anyqtaldy, olardyń barlyǵy basqa elderden ákelingen. Al Qostanaı oblysyna keletin bolsaq, sońǵy bes jylda asa qaýipti juqpaly aýrýlardyń oshaǵy tirkelgen joq. Biraq qyzmetter báribir kez kelgen nársege daıyn bolý úshin jattyǵýlar jasaıdy.
