Foto: baq.kz
Ákimdik málimetinshe, atalǵan aýdandaǵy 240 gektar renovasııadan ótedi. Jańartý baǵdarlamasy sheńberinde 2024 jyly 60 apatty úıdiń (shamamen 4200 adam) turǵyndaryn 1400 jańa páterge kóshirý josparlanǵan.
Aýqymdy qurylys jumystaryn júrgizý úshin BI-Group, «Moı dom» jáne Galamart syndy iri kompanııalar tartylady.
Turǵyndar kelisimi negizinde Egemen Qazaqstan men Kenesary, Imanov pen Beısekbaev, Taha Hýseın men Táshenev kósheleriniń qıylysynda jumystar bastaldy.
«Eski turǵyn úı máselesin sheshýde kásipkerlerdiń áleýetin jumyldyrý jáne jeke qurylys salýshylardyń ınvestısııalyq belsendiligin yntalandyrý qajet. Osylaısha, apatty jáne tozyǵy jetken turǵyn úı máseleleri birlesken kúsh-jigermen sheshiledi. Nátıjesinde qalanyń ortalyq bóligimen birge onyń sheti de damıdy, tıisinshe qalanyń eski bóliginiń kelbeti de ózgeredi», dedi Baıqońyr aýdanynyń ákimi Talǵat Rahmanberdi.
Jańartý jumystary turǵyndardyń ómir súrý sapasyn arttyrýǵa baǵyttalǵan.
Jergilikti turǵyndarmen kezdesýde «Moı dom» kompanııasynyń ókili Aıbek Eseev olardyń apattyq múlkin tıisti zańnamany basshylyqqa ala otyryp baǵalaýdan keıin, ózara kelisim boıynsha satyp alýǵa daıyn ekenin atap ótti.
Astananyń turǵyn úı qoryn jańǵyrtý men renovasııanyń 2028 jylǵa deıingi memlekettik baǵdarlamasy aıasynda Baıqońyr aýdanyndaǵy Asan Qaıǵy kóshesinde alty jolaqty jol salynady. Bul jol Amman kóshesinen Taha Hýseın kóshesi arqyly Alash tas jolyna deıin sozylady. Joǵaryda atalǵan ınvestorlardyń kómegimen oń jáne sol jaǵalaýdy tikeleı baılanystyrylady.
