Sáýirdiń jetisinde qalypty deńgeıinen 8 metr joǵary kóterilgen Tobyldyń sýy aınalasyn astan-kesten etip ketkeni málim. Sodan bergi eki aıǵa jýyq ýaqyt ishinde atalǵan aýmaqtarda kún saıyn senbilik uıymdastyryldy. Tazalyq aksııasyna uzyn yrǵasy 2,5 myńnan asa adam, júzdegen mekeme, kásiporyn ujymdary qatysyp, qala aýmaǵynan 8 myń, sý astynda qalǵan saıabaqtardyń aýmaǵynan 11 myń tekshe metr qoqys shyǵaryldy. Osylaısha, ózenge jaqyn jatqan «Shaǵala» serýen alaby, Trıatlon Park aýmaǵy, qalalyq jaǵajaı men «Dorojnık», «Sadovod» saıajaı birlestikteri qoqystan arshylyp, ajary qaıta kirdi. Máselen, «Dorojnık» saıajaıynda 230 jer telimi, turaqty túrde turyp jatqan 18 otbasy bar. 42 otbasy jyl-on eki aı boıy «Sadovod» saıajaıynda turyp jatyr. «Taza Qazaqstan» aksııasy aıasynda osy atalǵan eki saıajaı birlestiginiń ózinen qyrýar qoqys shyǵaryldy. Bul iste IIM Qostanaı akademııasynyń kýrsanttary kóp kómek kórsetti. Kýrsanttar saıajaıdyń aýmaǵyna qarǵyn sý aǵyzyp ákelgen qalyń qamysty, qıraǵan qorshaý, synǵan shatyr, synǵan terezelerdiń bárin bir jerge jınap, úıip tastady. Bul úıindilerdi kólikke tıep, syrtqa shyǵarý jaǵyn «Konglomerat. kz» seriktestigi rettestirdi.
«Biz eriktiler men kýrsanttarǵa, sondaı-aq jekelegen kásiporyndar men merdigerlerge shynaıy rızashylyǵymyzdy bildiremiz. Olardyń kómeginsiz tasqyn sý ákep úıip tastaǵan qoqysty bıyl tazartyp shyǵý múmkin emes edi. Aınalasy eki aıǵa jýyq ýaqyt ishinde qyrýar sharýa tyndyryldy. Oraıy kelgende aıtarym, Qazaqstanda eldi mekenderdi damytýǵa arnalǵan arnaıy baǵdarlamalar jaqsy jumys istep jatyr. О́kinishke qaraı, sol baǵdarlamalarǵa saıajaı birlestikteri ilikpeı qalyp otyr. Sondyqtan qala mańyndaǵy saıajaılardyń ınfraqurylymyn damytyp, abattandyrýǵa arnalǵan memlekettik baǵdarlama bolsa degen tilegimiz bar. Mysaly, mundaǵy 1976 jyly tartylǵan ınjenerlik kommýnıkasııa áldeqashan tozyp ketken. Biz ony óz kúshimizben jańarta almaı otyrmyz», deıdi «Sadovod» saıajaı birlestiginiń tóraǵasy Oleg Moshenko.
Qala ákimdiginiń málimetinshe, qazir qala mańyndaǵy saıajaılarǵa sý tasqyny kezinde úzilgen elektr symdaryn qaıta tartý, sý qubyryn qalpyna keltirý jumysy júrip jatyr.
Qostanaı oblysy
