Sýretti túsirgen – Erlan OMAR, «EQ»
Keshe elimizdegi mektepterdiń 1-10 synyp oqýshylary úshin oqý jylynyń aıaqtalýyna oraı «Bilimim – Otanyma» atty biryńǵaı synyp saǵattary ótkizildi. Al búgin, ıaǵnı 25 mamyr kúni Oqý-aǵartý mınıstrliginiń bekitken josparyna sáıkes orta bilim berý uıymdarynda mektep túlekterine arnalǵan «Mektebim, saǵan myń alǵys!» atty saltanatty jıyn ótkiziledi.
Jaýapty mınıstrliktiń taratqan aqparatyna súıensek, bıylǵy oqý jylyn bas-aıaǵy 22 myńnan asa mektepke deıingi, orta bilim, tehnıkalyq jáne kásiptik bilim oshaqtary aıaqtaıdy. Al bul uıymdarda osy oqý jylynda 5 mıllıonnan kóp bala bilim men tárbıe aldy. Onyń ishinde, joǵaryda jazǵanymyzdaı, 4 mıllıonǵa tarta oqýshy mektepte oqydy. Osynshama balanyń 341 myńnan kóbi 9-synypty aıaqtaıdy, byltyr 9-synypty 288 myńnan asa oqýshy támamdaǵan. Olardyń arasynda 10-synypty jalǵastyratyny da, kolledjge oqýǵa ketetinderi de bolady. Dál sol oqýyn tehnıkalyq jáne kásiptik bilim oshaqtarynda jalǵastyrýdy qup kóretinderge de búgin mekteptegi sońǵy qońyraý soǵylady.
Osylaısha, Oqý-aǵartý mınıstriniń buıryǵyna sáıkes mektepterde oqý merzimi resmı túrde búgin aıaqtalady. Biraq keıbir synyptardyń oqýshylary úshin alda emtıhandar bar. Aıtpaqshy, bıyl alǵash ret 5-8, 10 synyptarda qazaq tilin meńgerý deńgeıin baǵalaý maqsatynda qazaq jáne basqa da oqytý tilderi bar mektepter úshin qazaq tili boıynsha aralyq emtıhandar ótkiziledi. 5-11 synyp oqýshylaryna 27 mamyrdan bastap emtıhandar bastalady. 9-synyp oqýshylarynyń emtıhandary 29 mamyrdan 10 maýsymǵa deıin jalǵasady. 11 synyptar úshin qorytyndy emtıhandar 28 mamyr men 11 maýsym aralyǵyna josparlanǵan. Attestattardy saltanatty túrde tapsyrý 12-15 maýsym aralyǵynda ótedi. Osy jerde eske sala ketý kerek, emtıhandardan bosatylǵan oqýshylar da bar. Bul týraly Oqý-aǵartý mınıstri Ǵanı Beısembaev apta basyndaǵy Úkimet otyrysynda: «Premer-mınıstrdiń tapsyrmasyna sáıkes jáne tabıǵı sıpattaǵy tótenshe jaǵdaı jarııalanýyna baılanysty Atyraý, Aqtóbe, Soltústik Qazaqstan oblystarynyń 3 581 oqýshysy aralyq jáne qorytyndy emtıhandardan bosatylady. Qorytyndy baǵa olarǵa jyldyq baǵalar negizinde qoıylady», degen bolatyn. Al 156 myń tehnıkalyq jáne kásiptik bilim berý uıymdaryn bitirýshiler úshin qorytyndy attestattaý 28 maýsymǵa deıin júrgiziledi, al dıplom tapsyrý rásimi 28 maýsym men 1 shilde aralyǵynda ótedi.
Oqyp otyrǵan oqyrmanda, ásirese balalarynyń demalysyn olardan da asyǵa kútetin ata-analarda «Demalys qashan?» degen suraq týatyn shyǵar. Demalys máselesine kelsek, bastaýysh synyp oqýshylary mamyr aıynyń sońǵy kúnderinen dástúrli túrde jazǵy demalysqa shyǵady. Al qalǵan mektep oqýshylaryna emtıhandardan keıin jazǵy demalys bastalady. Mınıstr Ǵ.Beısembaev apta basyndaǵy Úkimet otyrysynda sý tasqynynan zardap shekken jáne aýa raıynyń qolaısyzdyǵyna baılanysty qysqy ýaqytta qashyqtan oqyǵan 2 622 mekteptiń 832 myń oqýshysyna 27-31 mamyr aralyǵynda «Jazǵy mektep» jumysy uıymdastyrylatynyn aıtty. Mınıstrdiń aıtýynsha, «Qazaqstan halqyna» qorynyń qoldaýymen «QH Jazdyq joldama» jobasy sheńberinde 20 myń bala tegin demalady. Olardyń ishinde sý tasqynynan zardap shekken óńirlerdiń oqýshylaryna, halyqtyń áleýmettik osal toptarynyń balalaryna jáne aýyldyq jerlerden kópbalaly otbasylarǵa basymdyq beriledi.
Osy joldardy jazyp jatqanda Oqý-aǵartý mınıstri Ǵ.Beısembaev 2023-2024 oqý jylynyń aıaqtalýyna oraı quttyqtaýyn jarııalady. Ol óziniń quttyqtaýynda: «Qurmetti áriptester, ata-analar, oqýshylar! Osy oqý jylynda oqýshylarymyz 10 halyqaralyq olımpıadada 243 medal jeńip aldy. Onyń ishinde 20 – altyn, 95 – kúmis, 128 – qola medal bar. Sizderdi shyn júrekten quttyqtaımyn jáne munymen toqtap qalmaýdy tileımin! Qurmetti pedagogter! Bıylǵy kóktem, ásirese batys jáne soltústik óńirlerdegi áriptesterimizge aýyrtpashylyq ala keldi. 26 myńnan asa bilim berý qyzmetkerleri sý tasqynyna qarsy kúreste aldyńǵy qatarda boldy. Qıyndyqtarǵa moıynsunbaı, aǵartýshylyq mıssııany adal atqardyńyzdar. Qurmetti túlekter! Sizder ómirdiń jańa, jaýapty kezeńine aıaq basqaly tursyzdar, bul sizderge ǵana emes, bárimiz úshin – ata-analar, muǵalimder, tálimgerler úshin de jan tebirenter sát. Bıyl 150 myńnan asa kolledj bitirýshi dıplom ıelenip, tolyqqandy maman bolady. Sizderge aq jol tileımin!», dep aqjarma peıilin aqtardy.
