Foto: kazgazeta.kz
Kezdesýde Dıhan Qamzabekuly qytaılyq jýrnalısti seriktestiktiń tynys-tirshiligimen tanystyryp, ǵasyrlyq tarıhy bar «Egemen Qazaqstan», «Kazahstanskaıa pravda» gazetteri týraly áńgimelep, «Qazaq gazetteri» quramyndaǵy ózge de basylymdarǵa toqtaldy. Sondaı-aq seriktestiktiń birqatar Qytaı basylymdarymen áriptestik baılanysy baryn aıtyp ótti.
Osy qyzmetinde jylǵa jýyq ýaqyt qana jumys istep kele jatqan qytaılyq jýrnalıst «Kazahstanskaıa pravda» gazetimen tyǵyz baılanysy baryn aıtty. Sonymen qatar ol seriktestik basylymdarynyń «Jenmın Jıbao» gazetiniń «Bir beldeý, bir jol» jobasy aıasynda qurylǵan medıaodaqtyń músheligine ótý jóninde usynys jasady. Osy odaq jyl saıyn óziniń medıaforýmyn ótkizip, sol is-shara aıasynda shetel jýrnalısteri úshin Beıjiń qalasyna saıahat uıymdastyryp turady eken.
Sondaı-aq D.Qamzabekuly men Lı Chııań áriptestik sheńberinde gazetke jarııalanatyn maqalalar jaıynda pikir almasty.
«Buǵan deıin sizdermen áriptestik baılanysymyz bolǵan joq. Sondyqtan gazetterińiz respýblıka kóleminde taraıtyn tanymal da irgeli basylym bolǵandyqtan, biz ekijaqty áriptestik, yntymaqtastyǵymyzdy nyǵaıtqymyz keledi. QHR tóraǵasy Sı Szınpınniń maqalasyn, aldaǵy ýaqytta Astanada bolǵaly otyrǵan ShYU sammıtine qatysty materıaldardy gazetterińizde jarııalaý jóninde usynysymyz bar», degen qytaılyq gazet ókiline seriktestik basshysy qos memlekettiń Syrtqy ister mınıstrlikteri deńgeıindegi tıisti ruqsat qujattary rettelse, mundaı usynysty qoldaýǵa daıyn ekenin jetkizdi.
Sondaı-aq ol materıaldardy múmkindiginshe «Egemen Qazaqstan» jáne «Kazahstanskaıa pravda» gazetterine birdeı jarııalaý jónindegi óz pikirin ortaǵa saldy.
Taraptar aldaǵy ýaqytta jalpy qazaq-qytaı yntymaqtastyǵyn jandandyrýǵa medıa salasy boıynsha úles qosýǵa, áriptestik baılanysty damyta túsýge kelisti.
