Oqytý baǵdarlamalary eńbek naryǵynyń suranystaryna súıene otyryp jasaldy. Máselen, joba aıasynda zamanaýı mamandyq – mobılografııany da tegin oqýǵa bolady. Nátıjesinde, olar smartfon arqyly sándi foto men beınejazbalar túsirip, montajdap, daıyn kontent jasaýǵa mashyqtanady. «Joltap» jobasyndaǵy «Mobılografııa» kýrsynyń oqytýshysy Kámshat Qapardyń sózinshe, jahanda aqparattyq tehnologııa qaryshtap damyǵan saıyn, SMM, mobılograf mamandyǵyna da suranys artty.
– Bul salada júrgenime úsh jylǵa jýyqtady. Iаǵnı SMM-mobılograf bolyp jumys isteımin. Negizgi mamandyǵym – zańger. Biraq maǵan foto, beınejazba túsirý jáne kúndelikti áleýmettik jelide belsendi bolǵan kóbirek unaıdy. Onyń ústine qazir adamdardyń kópshiligi áleýmettik jelini únemi qoldanady. Sáıkesinshe, SMM men mobılograf mamandyǵyna suranys eki ese artty. Sondyqtan hobbıimdi negizgi kásibime aınaldyrdym, – dedi ol.
Alty kúndik «Mobılografııa» kýrsynda mamandyqqa kirispe, montajdaý, zamanaýı beınejazba túsirý sııaqty teorııalyq jáne praktıkalyq sabaqtar ótedi. Kýrs barysynda praktıkaǵa basa nazar aýdarylady.
– Árqashan mamandyq boıynsha blog júrgizip, ózimniń oqýshylarymnyń jetistigimen bólisip otyramyn. Sodan bolar, maǵan «Joltap» jobasyna oqytýshy bolý týraly ótinish tústi. Joba bastamashysy – Astana qalasynyń ákimdigi. Jalpy mobılografııa kýrsy 6 kúndik oqýdan turady. Alǵashqy sabaq «Mobılografııaǵa kirispe» dep atalady. Onda mamandyq týraly teorııa negizinde túsindiremin. Keıin fototúsirilim boıynsha tájirıbe bolady. Iаǵnı ekinshi kúni beınejazba túsirýdiń qyr-syryn úıretemin. Montaj jasaý ádis-tásilderine de bir kún toqtalamyz. Ásirese montaj jasaýǵa arnalǵan qosymshalarǵa toqtalyp, sabaq barysynda montaj jasaımyz. Kýrstyń sońǵy sabaǵy «monetızasııa» dep atalady. Iаǵnı osy salada jumys istegisi keletin jandar úshin qalaı jumysqa ornalasýǵa bolady, jeke tapsyrys boıynsha foto, beıne túsirilimdi qandaı baǵaǵa usynýǵa bolatyny týraly aıtylady. Artynsha stýdentter test tapsyryp, portfolıo qorǵaıdy. Sondaı-aq foto, beınejazbalaryn kórsetedi. Eger barlyq tapsyrmany jaqsy oryndasa, onda kýrsty aıaqtaǵany týraly sertıfıkat beremiz, – dedi Kámshat Qapar.
Kúni búginge deıin mobılografııa boıynsha 450-500 shamasynda adam oqyp shyqqan. Bir qyzyǵy oqýshylardyń basym bóligi óz isin jańadan bastaǵan kásipkerler, dekrettegi analar men stýdentter eken. Sondyqtan jaýaptylar bıyl da joba boıynsha 10 myń turǵyndy jańa mamandyqtarǵa oqytýdy josparlap otyr.
Aıta keteıik, qatysýshylardyń tańdaýyna 14 mamandyq usynylǵan. Al oqytý baǵdarlamalary 2 aptadan 1 aıǵa deıingi qysqa merzimde praktıkalyq daǵdylardy usynýǵa baǵyttalǵan.
