Sýrette: konferensııa qonaqtary
Sondaı-aq Qazaqstan týrıstik qaýymdastyǵynyń tóraǵasy Rashıda Sháıkenova, «Týrızm ındýstrııasynyń ulttyq qaýymdastyǵy» zańdy tulǵalar birlestiginiń prezıdenti Raýshan Shámil, «Qazaqstan Respýblıkasynyń Ortalyq memlekettik murajaıynyń» dırektory Rashıda Harıpova, Ábilhan Qasteev atyndaǵy Memlekettik óner murajaıy dırektorynyń orynbasary Móldir Bıgeldıeva jáne basqa da mádenıet jáne týrızm salasyndaǵy qaıratkerler qatysty.
Mádenı is-shara Szıansý ólkesinde kóp aıtylatyn «Jasmın» ánimen bastaldy. Qazaqstannyń ulttyq mýzyka aspaptary men Szıansýdyń názik, syrly, áýezdi áýeniniń úılesimi erekshe áser syılady.
«Sı tóraǵa «Bir beldeý – bir jol» bastamasy jaıynda alǵash ret dál osy jerge – Qazaqstanǵa kelgen saparynda aıtty. Al Szıansý bolsa, «Jibek joly» ekonomıkalyq beldeýi men Teńiz Jibek jolynyń toǵysynda ornalasqan, Qytaıdyń shyǵysyndaǵy, teńiz jaǵasyndaǵy ólke. «Sý jáne mádenıet» – Szıansý ólkesiniń aıqyn sıpaty. Sý men mádenıettiń úılesimi Szıansýdiń ǵajaıyp tabıǵatyn, til úıirer taǵamdaryn, sony mádenıeti men ádemi ómir saltyn qalyptastyrdy. Búgingi konferensııa Szıansý ólkesi men Qazaqstan arasynda mádenıet jáne týrızm salasyndaǵy yntymaqtastyqty tereńdete túsýge yqpal etedi», degen Szıansý ólkesiniń Mádenıet jáne týrızm departamenti dırektorynyń orynbasary Ma Lýn sóz sońynda «Szıansý sýynyń áýenin» tyńdap, qulaq quryshyn qandyrý úshin Qazaqstandaǵy dostaryn Szıansýǵa shaqyrdy.
Qytaıdyń Almatydaǵy Bas konsýldiginiń Bas konsýliniń orynbasary Lıýı I óz kezeginde «Szıansýdyń biregeı geografııalyq orny erekshe mádenıet qalyptastyrǵanyn, eki el arasynda qarym-qatynastyń qarqyndy damyp kele jatqanyn» aıryqsha atap aıtty.
Qytaıdyń Almatydaǵy Bas konsýldigi eki eldi jalǵastyrýshy kópir bolyp otyr. Ásirese,«Qazaqstandyq týrızm jyly» aıasynda joǵary deńgeıdegi yntymaqtastyqty arttyrýǵa, birlesken mádenı jáne týrıstik almasýǵa erekshe qoldaý kórsetýde.
Konferensııada sóz alǵan Almaty oblysynyń Týrıstik aqparattyq ortalyǵynyń dırektory Marat Kósherdiń málimdeýinshe, Szıansý ólkesi Mádenı jáne týrıstik basqarmasy ókilderiniń elimizge arnaıy at basyn buryp kelýiniń mańyzy zor. Ásirese, Qytaı men Qazaqstan arasyndaǵy mańyzdy oqıǵalardy eskergende: 2024 jyl Qytaıda «Qazaqstandyq týrızm jyly» dep jarııalanyp otyr. Bul taraptar arasyndaǵy yntymaqtastyqty jáne tájirıbe almasýdy keńeıtý úshin jańa múmkindikter ashady.
«Szıansý – sulý tabıǵatqa, ejelgi sáýletti qurylystarǵa jáne ǵajaıyp tarıhı mádenıetke baı ólke. Almaty oblysy bolsa, asqar taýlarymen, móldir kólderimen jáne tarıhı eskertkishterimen tartymdy. Eki ólkeniń kelbeti uqsamaǵanymen, erekshe kóriktiligi jaǵynan bir-birinen kem túspeıdi. Eki tarap ta mádenı muralardy kózdiń qarashyǵyndaı saqtaıdy. Sondaı-aq turaqty damýdy da asa baǵalaıdy. Bul Mádenıet jáne týrızm ındýstrııasynyń damýyna eleýli yqpal etpek. Nátıjeli ári uzaq merzimdi yntymaqtastyqty udaıy arttyryp otyrý úshin eki tarap ta kúsh-jigerin aıamaıdy dep senemiz», dedi Marat Kósher.
Ekijaqty basqosý aıasynda Szıansýdyń mádenı jáne týrıstik ónimderi tanystyryldy. Qonaqtarǵa Szıansýdyń 4 qyry – búkilálemdik murasy, ejelgi qalalary, materıaldy emes mádenı muralary, ulttyq taǵamdary men belsendi demalys oryndary kórsetildi.
«Bıylǵy jyl Qytaıdaǵy Qazaqstannyń týrızm jyly bolyp jarııalandy jáne qazirgi ýaqytta eki el arasynda óte tyǵyz qarym-qatynas ornatylýda. Vızasyz rejım bizdiń Prezıdentter ekijaqty kelisimge qol qoıǵan 2023 jyldyń 2 qarashasynan bastap kúshine endi. Osylaısha, týrızmniń damýy qazir jaqsy damyp keledi. «Bir beldeý jáne bir jol» josparynyń arqasynda biz Uly Jibek jolyn birge damytamyz dep senemiz. Búgingi tanysýdy tyńdaǵannan keıin Szıansý provınsııasy jergilikti peızajdar óte ádemi jáne mádenı týrıstik resýrstarǵa baı ekenine kóz jetkizdik. Biz bul sulýlyqtardy kózben kórý úshin Szıansýǵa barýymyz kerek», dedi Qazaqstan ulttyq týrıstik ındýstrııa qaýymdastyǵynyń prezıdenti Raýshan Shámil.
Szıansý ólkesiniń týrıstik ındýstrııasynyń ókili retinde CITS JShQ (Szıansý) qazaqstandyq STEPSKY týroperatorymen strategııalyq yntymaqtastyq týraly kelisim jasady. Týrızm naryǵyn birlese damytýǵa ýaǵdalasty.
Is-sharada Szıansýdyń naqyshty oımalary men materıaldy emes mádenı murasy kórsetildi. Szıansý ólkesiniń Kórkem óner murajaıynan arnaıy aldyrylǵan muralar qonaqtarǵa erekshe áser syılap, Szıansý ólkesiniń mádenıetin tereń túsinýge múmkindik berdi.
Szıansý ólkesiniń mádenıet jáne týrızm departamentiniń delegasııasy Qazaqstan Respýblıkasynyń Ortalyq memlekettik murajaıyn, Ábilhan Qasteev atyndaǵy Memlekettik óner murajaıyn tamashalap, ekijaqty kelissózder júrgizdi.
Almaty oblysy
