Sýretti túsirgen – Aıbolat ShAMURATULY
Elimizdiń memlekettik týynyń túsin eske salatyn erekshe kól Oral qalasynda 1976 jyldan beri qyzmet etip turǵan ák zaýytynyń óndiris aýmaǵynda ornalasqan. Iаǵnı kóldiń ózi tabıǵı bor qazyp alynǵan qazan shuńqyrlardyń túbinen paıda bolǵan. Bul jerge keletin joldy ekiniń biri bile bermeıdi, eshqandaı silteme belgi ornatylmaǵan.
– Zeńgirkól qazirdiń ózinde Oral qalasynyń tanymal brendteriniń birine aınalyp úlgerdi. Qalaǵa kelgen týrıster kórgisi keletin nysannyń biri – osy. Jaqynda Qostanaı qalasynan kelgen saıahatshy Amandyq Ámirhamzın da osy jerdi arnaıy kórip ketti. О́kinishke qaraı, bul jer kelýshilerge laıyqtalmaǵan, jol joq. Tıisti oryndar osyndaı jańalyqqa tez beıimdelip, shuǵyl sheshim shyǵaryp, kelýshilerge jaǵdaı jasap, jergilikti týrızmniń damýyna úles qosqany jón bolar edi, – deıdi ólketanýshy, Batys Qazaqstan oblysy týrıster qaýymdastyǵynyń dırektory Aıbolat Qurymbaev.
Zeńgirkóldi kórgen halyq onyń kórkemdigin Maldıv araldaryna, Islandııanyń áıgili kógildir bastaýlaryna, aq borly shatqaldardy Pamýkkalege teńep jatady. Shynynda da aınala appaq borly saı-sala, shatqal túbindegi erekshe tústi tunyq kól kórgen janǵa keremet áser syılaıdy.
Osy oraıda «Batys Qazaqstan Qurylys materıaldarynyń korporasııasy» aksıonerlik qoǵamy quramyndaǵy Oral ák zaýytynyń dırektory Ramazan Nurlıevke jolyǵyp, Zeńgirkól týraly suraǵan edik.
– Iá, halyq qyzyǵyp kórip, sýretterin taratyp júrgen erekshe kól bizdiń qoldanystaǵy karer, bor alyp jatqan ashyq ken orny ǵoı. Kelýshiler kóbeıip jatqanyn baıqap júrmiz. Qazir kúnine shamamen 200-deı adam keledi. Biz alǵashynda kelýshilerge yńǵaıly bolýyna joldy rettep, kól jaǵalaýyna saty-tepshekter ornatyp, halyqqa jaǵdaı jasap qoıǵymyz kelip edi. Biraq zańgerimiz olaı bolmaıtynyn aıtty. Karerdiń negizgi mindeti – ken óndirý. Bizdiń jarǵymyzda solaı jazylǵan. Eger halyqqa qyzmet kórsetý kerek bolsa, onda qujattardy ózgertý kerek bolady. Onyń ústine óndiris aımaǵynda aýyr tehnıka júredi. Sýdyń keı jeri tereń. Qaýipsizdik sharalaryn saqtamasa, bolmaıdy. Qazir kól mańyna kúzet qoıdyq. Biraq halyqtyń kelýin toqtata alar emespiz. Shynymdy aıtsam, qazir ózimizdiń basymyz qatyp otyr, – deıdi Ramazan Tasbolatuly.
Bir qyzyǵy, Zeńgirkóldegi sý mólsheri Jaıyq ózeniniń deńgeıimen baılanysty eken. О́ıtkeni óńirde qýańshylyq bolyp, Jaıyq sýy tapshy bolǵan jyldary bul jerde de sý bolmaǵan. Zeńgirkóldiń erekshe tústi sýy byltyr kóktemde kórinip, jaz aıaǵyna qaraı keýip qalypty. Al bıyl ózenniń arnasy tolyq, óńirde saı-sala sýǵa toly. Sodan da bolar, Zeńgirkóldiń de sýy mol kórinedi.
– Kól sýynyń erekshe túsi onyń tabanyndaǵy bor jynysyna baılanysty. Dál osyndaı tústi kólder Dender mańyndaǵy ashyq karer oryndarynda jıi kezdesedi. Eger qajettilik týsa, biz sýdyń quramyn zerttep, adamǵa keletin zııan-zardap bar ma, joq pa, anyqtap bere alamyz, – deıdi geografııa ǵylymdarynyń kandıdaty, professor Qajymurat Ahmedenov.
Aıbolat Qurymbaev AQSh-qa barǵan saparynda aqsha banknotyn basyp shyǵaratyn fabrıkany aralap kórgenin eske alyp, shetelde kez kelgen óndiris mekemesi týrızm salasyna yńǵaılastyrylatynyn, bizge de sol úrdisten úlgi alý qajettigin aıtady. Shynynda da ádemi sýretimen kózdi arbaǵan Zeńgirkól ázirge ıesiz, qamqorshysyz qulazyp tur. О́kinishti-aq.
Batys Qazaqstan oblysy
