Foto: smartnews.kz
Fransııanyń Qazaqstandaǵy elshiliginde Qazaqstan men Fransııanyń kınoóndiris salasyndaǵy yntymaqtastyǵy jan-jaqty talqylanyp, birqatar joba kelisildi. Endi elimizde fransýz premeralarynyń aptalyǵy uıymdastyrylyp, odan keıin qazaq tilindegi fransýz fılmderi usynylady.
«Biz qazan aıynda fransýz fılmderi premeralarynyń aptalyǵyn ótkizýdi josparlap otyrmyz. Onda eń tanymal fransýz fılmderi qazaq kórermeni nazaryna usynylady. Premera aptasynan keıin alǵash ret qazaq tiline dýblıajdalǵan fransýz fılmderiniń kórsetilimin uıymdastyrýdy kózdep otyrmyz. Biz Fransııadaǵy qazaq fılmderin qoldaýǵa daıynbyz. Sondaı-aq Fransııanyń ulttyq kınematografııa jáne anımasııa ortalyǵy (CNC) sarapshylarynyń Qazaqstanǵa jumys sapary uıymdastyrylady», dep habarlady Fransııanyń Qazaqstandaǵy elshiligi.
Sondaı-aq birlesken kıno óndirisi jáne eki jaqty kınoprokat baǵyttarynda turaqty kezdesýler ótkizý josparlanyp otyr.
«Bilim berý semınarlary men qazaqstandyq mamandardy Fransııada oqytý múmkindikteri qarastyrylyp jatyr. Memlekettik kınony qoldaý ortalyǵymen jáne sala mamandarymen birlese otyryp, eń paıdaly baǵyttardy anyqtaýǵa kúsh salamyz», dedi Fransııanyń Qazaqstandaǵy elshiligi.
Aıta keteıik, Qazaqstannyń Ulttyq kınematografııasyn qoldaý ortalyǵy men Fransııanyń Ulttyq kınematografııa jáne anımasııa ortalyǵy Kanndaǵy halyqaralyq kınofestıval aıasynda yntymaqtastyq týraly qosymsha kelisimge qol qoıdy. Taraptar kınoónimderin taratý máseleleri boıynsha yntymaqtasýǵa kelisken edi.
