foto: senate.parlam.kz
«Búgin – Saıası qýǵyn-súrgin jáne asharshylyq qurbandaryn eske alý kúni.
HH ǵasyrdyń birinshi jartysynda halqymyz óz tarıhyndaǵy asa aýyr oqıǵalardy basynan ótkerdi. Mıllıondaǵan adam qýǵyn-súrgin jáne asharshylyq jyldarynyń taýqymetin tartty. Sondyqtan 31 mamyrdy sol kezeńderdi eske alatyn jáne tarıhtan taǵylym alatyn kún retinde atap ótemiz.
Qazirgi tańda Prezıdentimiz Qasym-Jomart Kemeluly Toqaevtyń bastamasymen ótkendi zerdeleý, oǵan obektıvti baǵa berý, sonyń negizinde ultymyzdyń tarıhı sanasyn jańǵyrtý jolynda aýqymdy jumystar júrgizilip keledi. Sonyń aıasynda Qazaqstan tarıhynyń kóptomdyq akademııalyq jınaǵy ázirlenip jatyr», dep jazdy M.Áshimbaev
Senat tóraǵasynyń aıtýynsha, bul jumystar ótkenniń aqıqatyn jaqyn tanyp, halqy úshin qurban bolǵan arystarymyzdy ulyqtaýǵa jáne jazyqsyz zardap shekken azamattardy umytpaýǵa yqpal etedi.
«Munyń bári, túptep kelgende, halqymyzdyń birligin bekemdeı túsetin, beıbit kúnniń qadirin arttyratyn, óskeleń urpaqtyń otanshyldyq rýhyn shyńdaıtyn qadamdar ekeni sózsiz. Sondyqtan tarıhymyzdy túgendeý úzdiksiz jalǵasa beredi.
Jalpy, bul kúnniń halqymyz úshin taǵylymy mol, baǵasy basym. Sol sebepti, ony dáripteý, babalar rýhyna taǵzym etý – barshamyzdyń azamattyq paryzymyz. Endi eshqashan mundaı náýbetter bolmasyn! Elimiz aman, jurtymyz tynysh bolsyn! Táýelsiz Qazaq eli máńgi jasaı bersin!», dep jazdy M. Áshimbaev.
