Sýretti túsirgen – Erlan OMAR, «EQ»
Arystar rýhyna taǵzym etken is-sharaǵa ǵalymdar men ardagerler, Alash zııalylarynyń urpaqtary, «Egemen Qazaqstan» gazetiniń jýrnalısteri jáne Eýrazııa ulttyq ýnıversıtetiniń stýdent-jastary qatysty.
Eske alý rásiminde Baıqońyr aýdanynyń ákimi Talǵat Rahmanberdi ult úshin basyn báıgege tigip, qurban bolǵan Alash zııalylarynyń esimin el jadynda qaldyrý, osy baǵytta elordada atqarylyp jatqan jumystar týraly aıtyp ótti.
Ákimniń pikirinshe, Alash qaıratkerlerine kórsetiler qurmet, jastardyń sanasyna otanshyldyq rýhty sińirý baǵytyndaǵy osyndaı is-sharalar budan keıin de jalǵasyn tabady.
«Qazaq gazetteri» seriktestiginiń bas dırektory, alashtanýshy Dıhan Qamzabekuly:
– Memleket basshysy Qasym-Jomart Toqaevtyń Jarlyǵymen qurylǵan Saıası qýǵyn-súrgin qurbandaryn tolyq aqtaý jónindegi memlekettik komıssııa byltyr jyl sońynda qorytyndysyn shyǵardy. Qolǵa alynǵan jemisti jumystyń nátıjesinde 311 myń adam aqtalyp, 2 mln 500 myńdaı qujat qupııasyzdandyryldy. Bul – óte aýqymdy jumys. О́kinishke qaraı, Alash qaıratkerleriniń kóbiniń beıiti joq. Olardyń árbiriniń aty-jóni, qaıǵy-qasireti, aýyr joly týraly estelikter men oqıǵalar tarıhta tolyq jazylmaıynsha, ǵylymı jumystar toqtamaıdy. Smaǵul Sádýaqasuly aıtqandaı, artymyzǵa anyq kóńilmen, aldymyzǵa ashyq kózben qaraıyq, – dedi.
Munan keıin tarıhshy-professor Qadyr Ahmetov pen Alash urpaǵynyń ókili Jambyl Kámelov sóz alyp, Qaraótkel qorymynyń tarıhı orny men repressııa taǵylymy týraly tálimdi oı aıtty.
Esterińizge sala ketsek, ult zııalysy S.Sádýaqasulynyń Máskeýdegi Don zıratynan máıit-kúli 2011 jyly Astanaǵa jetkizilip, osy Qaraótkel qorymyna qaıta jerlengen. Alash ardaqtysy elimizdiń bas basylymyn 1921–1926 jyldar aralyǵynda eki márte basqarǵan.
