Memleket basshysy Qasym-Jomart Toqaev sý tasqynynan zardap shekken turǵyndarǵa jan-jaqty qoldaý kórsetýdi tapsyrǵan bolatyn. Bıyl oblystyń birneshe aýdanyn ábigerge salǵan tabıǵat apaty saldarynan myńdaǵan turǵyn baspanasyz qaldy. Qazir oblys ákiminiń tapsyrmasy boıynsha óńirde qurylys jumysy qarqyndy júrip jatyr. Oblys boıynsha jańadan salynyp jatqan turǵyn úıdiń sany 401-ge jetti. Munyń ishinde 60 úı osy Bórli aýdanynda salynýda. Josparǵa sáıkes, ár úıdiń kólemi 80 sharshy metr bolady.
Búgin aýdan boıynsha 50 otbasy satyp alynǵan jańa páterine kóship bardy. Solardyń biri kópbalaly ana Láılá Jumaǵalıeva memleket tarapynan jasalyp jatqan kómek úshin alǵys aıtty.
«Sý tasqyny saldarynan Bórli aýdany Pýgachev aýylyndaǵy úıimiz qatty búlindi. Úıimizdi tekserip, «turýǵa jaramsyz» degen sheshim shyǵarǵan komıssııa bizge Aqsaı qalasynan úı satyp alýdy usyndy. Mine, búgin tórt bólmeli páterge kirip otyrmyz. Qýanyshymyzda shek joq. Osyndaı qamqorlyǵy úshin eń aldymen Prezıdentimizge alǵys aıtamyz», dedi Láılá Jumaǵalıeva.
Bórli aýdanynda sý tasqynan zardap shekken aýdan turǵyndary 150 aılyq eseptik kórsetkish mólsherindegi áleýmettik kómek alǵan edi. Al turmystyq zattar men jıhazdardyń shyǵynyn óteý úshin bórlilik 168 otbasyǵa 63 mln teńge kóleminde qarjy taǵy tólendi.
«Turǵyndardyń óz qalaýy boıynsha Batys Qazaqstan oblysynyń Terekti aýdanynda – 5 úı, Báıterek aýdanynda – 2 úı satyp alyndy. Al, Oral qalasyndaǵy jalǵyz baspanasy bolyp esepteletin, úıleri apatty dep tanylǵan saıajaı turǵyndaryna aldaǵy ýaqytta jańa úıler satyp alý jáne salý boıynsha jumys júrgizilip jatyr», dedi oblys ákiminiń baspasóz hatshysy Erhan Tátken.
